Халқаро Қизил Хоч Қўмитаси вакиллари Ислом Цивилизацияси марказига юқори баҳо берди
Халқаро Қизил Хоч Қўмитаси Марказий Осиё бўйича минтақавий делегацияси вакиллари Президент Шавкат Мирзиёевнинг ташаббуси билан барпо этилган Ўзбекистондаги Ислом цивилизацияси марказига ташриф буюрди.
Ўзбекистон инсонпарварлик йўналишида халқаро ташкилотлар билан ҳамкорликни кенгайтириш, инсон ҳуқуқларини ҳимоя қилиш ва ижтимоий-маърифий ислоҳотларни қўллаб-қувватлашда изчил фаолият олиб бормоқда.
9 та давлат делегация аъзолари минтақавий вакиллар ва экспертлар тарихий-маданий меросни замонавий технологиялар билан уйғунлаштирган ушбу ноёб мажмуада бўлиб, марказнинг экспозициялари, мультимедиа тақдимотлари, қадимий қўлёзмалар, археологик топилмалар, рақамлаштирилган манбалар ва интерактив бўлимлар билан батафсил танишди.
Марказ бўйлаб саёҳат давомида меҳмонларга илк цивилизациялардан бошлаб Биринчи ва Иккинчи Ренессанс даврлари, ислом илм-фани, ўзбек алломалари мероси ҳақида кенг қамровли маълумотлар тақдим этилди.
Халқаро Қизил Хоч Қўмитасининг Марказий Осиё бўйича минтақавий делегацияси раҳбари Билжана Милосевич ташриф якунида ўз фикрларини қуйидагича баён қилди:
“Бу марказга илк бор ташриф буюряпмиз ва чин дилдан айтишим керак — мен бу ерда кўрганларимдан ҳайратдаман. Экспозициялар нафақат илмий асосланган, балки жуда замонавий ва таъсирли тарзда ясалган. Интерактив бўлимлар орқали тарихнинг ичига киргандек бўласиз.
Энг муҳими — бу маскан инсоният меросининг қадрини юксалтирувчи, тинчлик ва ўзаро ҳурмат ғояларини тараннум этувчи муқаддас жой эканидир. Ўзбекистон халқига ва Президентга бундай улкан лойиҳа учун миннатдорлик билдираман.”
Халқаро Қизил Хоч Қўмитасининг Шарқий Европа ва Марказий Осиё мамлакатлари бўйича минтақавий координатори Жаля Азизова ҳам ўз таассуротларини яширмади:
“Марказнинг меъморий ечими, зал ва йўлаклар концепцияси, тарихий даврларнинг босқичма-босқич очиб берилиши — жуда таъсирли. Исломдан аввалги ёдгорликлардан тортиб, Шарқ уйғонишларигача бўлган жараёнларнинг бундай профессионал ёритилиши мени жуда илҳомлантирди.”
Ташриф давомида Халқаро Қизил Хоч делегацияси Марказни нафақат илмий-маърифий, балки маданий дипломатия майдонидаги йирик лойиҳалардан бири сифатида эътироф этди. Делегация аъзоларининг фикрига кўра, Ислом цивилизацияси маркази Ўзбекистоннинг жаҳонга очиқ, маърифатпарвар ва инсонпарвар сиёсатининг ёрқин намунаси бўлиб хизмат қилади.