Янгиликлар

Покистон делегацияси Ўзбекистондаги Ислом цивилизацияси марказига ташриф буюриб, бу ерда жамланган улкан тарихий, илмий ва маънавий мерос билан яқиндан танишди. Меҳмонлар “Исломдан аввалги давр”, “Биринчи Ренессанс”, “Иккинчи Ренессанс”, “Янги Ўзбекистон — янги ренессанс пойдевори” бўлимлари ҳамда Қуръон зали бўйлаб саёҳат қилиб, Марказда қўлланилган илғор технологиялар, 3D реконструкциялар, сунъий интеллект асосидаги интерактив контент, ноёб археологик топилмалар ва илмий асосланган экспозицияларни юксак баҳоладилар.

Покистон Бош вазири девонида савдо бўйича координатор Рана Иҳсаан Афзал Марказ ҳақидаги таассуротларини ҳайрат ва эътироф билан изҳор қилди:

“Бу Марказни дунёнинг ҳеч бир жойида кўрмаганман. Бу ерга кирган одам тарихнинг турли даврларида саёҳат қилгандек бўлади. 3D саҳналар, мультимедиа тақдимотлари ва илмий изоҳлар ўтмишни айнан кўз олдингизда жонлантиради. Ўзбекистон минг йиллик илм-фан меросини бир жойга жамлаб, замонавий талқинда намойиш эта олгани — жуда катта ютуқ”.

У, шунингдек, Бобурийлар давридан буён мавжуд бўлган икки халқ ўртасидаги тарихий яқинлик бугунги ҳамкорлик босқичида янада мустаҳкамланаётганини таъкидлади:

“Ўзбекистон–Покистон алоқалари айни пайтда янги босқичга кўтарилган. Савдо, транспорт ва дипломатик ҳамкорлик ҳажми йил сайин ошмоқда. Бухоро–Покистон ўртасида тўғридан-тўғри авиарейсларнинг йўлга қўйилиши ҳам бу жараённинг ёрқин мисолидир”.

Делегация таркибидаги “Daily Ittеhad” медиа гуруҳи бош муҳаррири Таҳир Фарооқ эса Марказни халқаро илмий жамоатчилик учун ибрат бўла оладиган йирик маърифий лойиҳа сифатида баҳолади:

“Ўзбекистон ўз тарихини нафақат сақлаб қолган, балки уни янги авлод учун энг замонавий услубда жонлантириб бера олаяпти. Ҳар бир залда илм бор, ҳар бир экспозиция ўтмишнинг янги саҳифасини очади. Сунъий интеллект ва мультимедиа технологияларининг бундай уйғунлиги тарихни янада чуқурроқ англашга ёрдам беради”.

Меҳмонлар Қуръон залидаги ноёб қўлёзмалар, буюк алломалар мероси, марказ концепциясининг изчил илмий асосланганлиги ва маърифий руҳини алоҳида эътироф этдилар. Делегация аъзоларининг фикрича, Ислом цивилизацияси маркази — “тарихни жонлантирган, илм ва технологияни уйғунлаштирган ноёб хазина” бўлиб, уни дунё миқёсида кенг тарғиб қилиш зарур.