Қуролли Кучлардаги ренессанс: келажак аскари қандай бўлади?
Универсал камуфляж, зирҳли нимча ва замонавий алоқа тизимлари билан жиҳозланган, ақл-заковат ва мардликни уйғунлаштирган келажак ҳимоячиси – Мудофаа вазирлиги ва Ислом цивилизацияси маркази ҳамкорлигида ташкил этилган экспозицияда Янги Ўзбекистон аскарининг портрети ана шундай қиёфада намойиш этилмоқда...
Бугунги кунда Ўзбекистонда Қуролли Кучлар қудратини ошириш ва мустаҳкамлашга қаратилган ислоҳотлар изчил ва тизимли равишда амалга оширилмоқда. Бу кенг кўламли чора-тадбирлар мамлакат тинчлиги ва хавфсизлигини таъминлаш, халқнинг осуда ва фаровон ҳаёти учун мустаҳкам кафолат яратади.
Қўшинларни замонавий қурол-аслаҳа, ҳарбий ва махсус техника ҳамда илғор жиҳозлар билан таъминлаш бўйича амалга оширилаётган комплекс чора-тадбирлар Давлат мудофаа қобилиятини янада кучайтиришга хизмат қилмоқда. Ушбу жараёнлар Ўзбекистондаги Ислом цивилизацияси марказининг “Янги Ўзбекистон – янги Ренессанс пойдевори” экспозицияларида ҳам кенг жамоатчиликка тақдим этилмоқда.
Экспозицияда замонавий ҳарбий технологияларга тўлиқ жавоб берадиган профессионал аскар тасвири яққол намоён бўлади. Универсал камуфляж кийимлари, жароҳатлардан ҳимояловчи бош кийимлар, тунги кўриш мосламалари, махсус кўзойнаклар ва зирҳли нимчалар билан жиҳозланган бундай аскар реал жанговар шароитларда самарали ҳаракатлана олади. Келажак аскари техник жиҳозланган, ақл-заковат ва мардликни уйғунлаштирган янги авлод Ватан ҳимоячисидир.
Шунингдек, экспозицияда таниқли тарихчи олимлар ва манбашунослар ҳамкорлигида қайта тикланган Соҳибқирон Амир Темурнинг жанговар байроғи ҳам алоҳида ўрин эгаллайди. Бу рамз миллий ҳарбий анъаналаримиз узвий давомийлигини ифодалайди.
Қўшинларнинг жанговар тайёргарлиги ва ҳарбий анъаналарни мустаҳкамлаш мақсадида Мудофаа вазирлиги миқёсида “Амир Темур жанговар байроғи учун” номли мусобақалар мунтазам равишда ўтказиб келинмоқда. 2016 йилдан буён амалга оширилаётган кенг кўламли ислоҳотлар натижасида Қуролли Кучларнинг жанговар шайлиги ва салоҳияти сезиларли даражада ошди, қўшинларнинг бошқарув ва ҳаракатланиш имкониятлари замон талабларига мослаштирилди.
Хусусан, Ҳаво ҳужумидан мудофаа қўшинлари ва Ҳарбий ҳаво кучлари замонавий автоматлаштирилган бошқарув тизимлари, ҳаво ҳужумидан мудофаа комплекслари, замонавий самолёт ва вертолётлар ҳамда янги авлод учувчисиз учиш аппаратлари билан таъминланди. Яқин истиқболда қирувчи авиация ҳимоясини уч баравар ошириш, қирувчи, ҳужумчи, ҳарбий-транспорт ва вертолёт авиацияларининг жанговар қобилиятини камида 1,5 бараварга кучайтириш режалаштирилмоқда.
“Бу экспозицияда шунингдек, ташриф буюрувчилар учун интерактив ўйинлар намойиш этилади,” – дейди Марказ илмий ходими Шарофат Юнусова.
Шу тарзда, Ўзбекистонда Қуролли Кучларда амалга оширилаётган ислоҳотлар мамлакат мудофаа қудратини мустаҳкамлаш, минтақавий хавфсизликни таъминлаш ҳамда тинчлик ва барқарорликни сақлаш йўлидаги муҳим қадам сифатида эътироф этилмоқда.