“Биз ҳали бундай музей ярата олмадик” — Франциялик эксперт Ўзбекистон тажрибаси ҳақида
“Биз ҳали музейларимизда сунъий интеллектни бундай даражада жорий этолмадик” — Анорбанкнинг Франциялик кузатув кенгаши аъзоси Ўзбекистондаги Ислом цивилизацияси марказини ана шундай баҳолади. Ташқи кўриниши муҳташам, ички контенти эса сунъий интеллект, визуал эффектлар ва овоз тизимлари билан бойитилган Ўзбекистондаги Ислом цивилизацияси маркази “Анорбанк”нинг хорижий муассислари меҳмонларда катта қизиқиш уйғотди.
Марказга ташриф буюрган делегация Ўзбекистондаги мега лойиҳанинг ноёб тарихий экспонатлари ва замонавий технологиялар билан бойитилган концепцияси, хусусан, “Исломдан аввалги давр”, Биринчи ва Иккинчи Ренессанс ҳамда “Янги Ўзбекистон – янги Ренессанс пойдевори” бўлимлари билан яқиндан танишишди.
Экпозицияларда тарихий жараёнларнинг аниқ ва тушунарли ёритилиши меҳмонлар эътиборини ўзига тортди. Айниқса исломдан олдинги ва кейинги даврлар ўртасидаги фарқ, меъморчилик ва таълимнинг ривожи ҳамда Темурийлар Ренессанси орқали бутун минтақа тарихини англаш имконияти делегация аъзоларини жуда қизиқтириб қўйди.
Стефани Ривоаль, “АНОРБанк” кузатув кенгаши аъзоси (Франция):
Илк дақиқаларданоқ Марказ инсонда жуда кучли таассурот уйғотади. Кўплаб музейларга эга мамлакатданман. Францияда, жумладан, Лувр каби жуда қадимий ва бой тарихга эга музейларимиз бор. У ерда турли ҳудудлар ва даврларга оид бебаҳо тарихий экспонатлар жамланган. Аммо шуни тан олиш керакки, биз ҳали музейларимизда сунъий интеллект, визуал ва интерактив технологияларни бу даражада кенг ва уйғун жорий эта олганимиз йўқ. Чунки у музейлар дастлаб бундай технологиялар учун мослаб қурилмаган. Менимча, Франциядаги мутахассислар бу марказга келиб, технологияларни тўғри интеграция қилиш бўйича тажрибангиздан ўрнак олишлари керак. Бу ерда барча замонавий ечимлар Марказ концепциясига илк босқичданоқ мукаммал сингдирилган. Бу ерга яна қайтиб, барча материалларни батафсил ўрганишни истардим.
Максимилиан Жонсон, “АНОРБанк” Назорат Кенгаши аъзоси:
Марказ фақат бугунги Ўзбекистон ҳақида эмас, балки Ўзбекистон тарихидан аввалги даврларни ҳам қамраб олади. Менимча, бу ер барча авлод вакиллари учун ислом дини ҳақида, шунингдек, Ўзбекистоннинг тарихий ва маданий жиҳатдан дунёга берган янгиликлари ҳақида билиб олиш учун ниҳоятда қизиқарли.
Очиғини айтсам, мен булар ҳақида аввал умуман тасаввурга эга эмас эдим. Бу лойиҳа кўп йиллар давомида режалаштирилганини эшитганман ва Президентингиз уни мукаммал даражада амалга ошириш учун катта қатъият билан иш олиб борган. Шу боис, марказга келиш имконига эга бўлганимиздан жуда хурсандман. Бу ерда кўриш керак бўлган нарсалар жуда кўп, шунинг учун яна келиб, кўпроқ вақт ўтказишни истардим.
Ташриф якунида меҳмонлар марказни юқори баҳолаб, унинг нафақат тарихий, балки маданий ва илмий жиҳатдан ҳам катта аҳамиятга эга эканини таъкидлади. Шунингдек, улар бундай инновацион ёндашувнинг бошқа мамлакатлардаги музейлар учун ҳам намунали эканини қайд этди.
