“Фан ва илм айнан шу заминдан бошланган” — АҚШ делегациясининг Ислом цивилизацияси марказидаги таассуротлари
“Бу марказ орқали фан ва илмнинг бошланиши айнан Ўзбекистон ҳудудида юз берганини англашимиз мумкин” – деди АҚШда Исо Масиҳнинг охирги кун авлиёлари черкови раҳбари Жек Н. Жерард.
Ўзбекистондаги Ислом цивилизацияси марказига АҚШнинг Исо Масиҳнинг охирги кун авлиёлари черкови вакилларидан иборат делегация ташриф буюрди. Меҳмонлар марказнинг барча бўлимлари билан яқиндан танишиб, экспонатлар ва интерактив лойиҳаларни ўрганиш имконига эга бўлдилар.
Ушбу делегация 2025 йилнинг октябр ойида ҳам Марказга ташриф буюрган. Навбатдаги ташрифда делегация аъзолари Марказ музейининг Биринчи Ренессанс бўлимида жойлаштирилган Имом Бухорий мажмуаси макетига катта қизиқиш билдиришди.
Иккинчи Ренессанс бўлимида меҳмонлар Темурийлар даври билан яқиндан танишиб, айниқса интерактив панелларни катта қизиқиш билан кузатишди. Шоҳрух Мирзо ва Бойсунғур Мирзо залида Гавҳаршод бегим образи орқали яратилган аудио тақдимот меҳмонларни ҳайратга солди. Сунъий интеллект орқали ўзбек тилида жонлантирилган аудио лойиҳа юқори савияда ишланганлигини эътироф этишди.
Шунингдек, меҳмонларнинг эътиборини Қўқон хони қиличи, Бобурийлар даврига оид Қуръони карим оятлари битилган либос ва Бибихоним либоси ўзига тортди.
Янги Ўзбекистон – янги Ренессанс пойдевори бўлимида эса меҳмонлар Янги Ўзбекистон маҳалласи макети қизиқиш билан кўздан кечирдилар. Бу ҳудуд уларга маъқул келиб, замонавий ёндашув ва мазмун билан уйғунлаштирилганини юқори баҳолашди.
Исо Масиҳнинг охирги кун авлиёлари черкови раҳбари Жек Н. Жерард таассуротлари билан бўлишаркан шундай деди:
“Ислом цивилизацияси маркази жуда гўзал маскан. Бу бизга дунёнинг ушбу қисми тарихи, хусусан, Ўзбекистоннинг бутун минтақадаги роли ҳақида кўп нарсани ўрганиш имконини берди. Президент Шавкат Мирзиёев бу ерда қилган ишлар ҳақиқатан ҳам дунёга катта ҳисса қўшган ажойиб лойиҳадир.
Бу марказ орқали фан ва илмнинг бошланиши айнан Ўзбекистон ҳудудида юз берганини англашимиз мумкин. Технология, интерактив экранлар ва аудио материаллар орқали қадимги дунёни ёшлар ҳам осон тушунади, бу эса болалар учун айниқса фойдали.”
Делагация аъзоси Пол Пикард ҳам ўз таассуротларини қуйидагича изҳор этди:
“Биз қадимий даврлардан тортиб замонавий даврларгача бўлган тарихни кўрдик, Биринчи, Иккинчи Ренессанс даврларидан ўтиб, ҳозирги Ўзбекистон экспозициясини ҳам кўрдик. Энг ажабланарлиси шундаки, марказ ёшларни билим олишга чақириш ғоясини кучли акс эттирган. Сунъий интеллект ва интерактив технологиялар орқали меҳмонлар қадимги олимларга савол бериш ва билимларни жонли ўрганиш имконига эга бўлишади.”
Делегация аъзоларини энг кўп ҳайратлантирган экспозиция бу Қуръони карим зали. Залнинг беқиёс ҳайбати ва айнан ноёб Қуръони карим учун махсус барпо этилгани юқори баҳоланди. Шунингдек, Португалия пушти мармарлари залга янада кўрк ва файз қўшганлиги алоҳида таъкидланди.
Якунда улар Президент Шавкат Мирзиёевга бу улуғвор лойиҳа учун миннатдорлик билдиришди.
