Янгиликлар

Ўзбекистондаги Ислом цивилизацияси марказида "Иккинчи Ренессанс даври" экспозициясидан ўрин оладиган экспонатлар рўйхати, факсимиле ва муляжлар тайёрлаш, ягона иш режаси тузиш ва йўл харитаси асосида вазифалар ижросини таъминлаш масалалари муҳокама қилинди.  

Шунингдек, Ўзбекистон Бадиий академияси рассомлар уюшмаси аъзолари томонидан чизиладиган суратлар, яратиладиган ҳайкаллар, миниатюра асарлари ҳам кўриб чиқилди.
 

"Бу ерда ўттизга яқин Темурийлар даври сиймолари акс эттирилиши керак. У “Вақт девори” номли деворий сурат кўринишида бўлади. Мазкур миниатюралар тарихий фактлардан келиб чиқиб чизилади. Шунингдек, Темурийлар давридаги оқила аёллар сиймосини шакллантириш бўйича муҳокамалар олиб бордик. Тўлиқ маълумотлар кенгаш олимлари томонидан тақдим этилиб, уларнинг маълумотлари асосида эскизларни яратамиз", — деди Беҳзод Ҳожиматов.

Муҳокама давомида Амир Темур сиймосини шу пайтгача шаклланганларидан кўра мукаммал яратиш юзасидан фикрлар билдирилди.

"Иккинчи Ренессанс экспозициясида Амир Темурни фақат саркарда эмас, балки унинг олимлар, шайх, ориф, пирлари билан суҳбатини экспозицияда акс эттириш лозим. Масалан, шоирлар билан учрашганда буюк фикр ва ғояларни ўртоқлашган. Ана шу нарсалар шоҳбайтлар шаклида ёзиб қолдирилган. 

Ҳусайн Воиз Кошифий ва Алишер Навоий асарларида қалам аҳли сифатида ҳукмдорлар, вазирлар, уламолар, шоиру адибларни ажратади. Ҳукмдор сифатида қалам ушлаб турган Соҳибқирон сиймосини кўришни истардим", — деди Филология фанлари номзоди Буробия Ражабова.