Марказий Осиёдаги мураккаб лойиҳалар мутахассиси: “Ҳар бир экспозиция қалбимизга яқин — булар бизнинг илдизларимиз”
Йирик шаҳарларда мураккаб лойиҳалар устида ишлаган мутахассисни ҳайратга солиш осон эмас. Шунга қарамай, Марказий Осиёдаги энг йирик халқаро қурилиш холдинги — BI-Group раҳбари Айдин Раҳимбаев бошчилигидаги делегация Тошкентда барпо этилган Ўзбекистондаги Ислом цивилизацияси марказига ташрифи чоғида ушбу мажмуа уларда кучли таассурот уйғотганини билдирди.
Делегация аъзолари Ўзбекистон Президенти ташаббуси асосида бунёд этилган Ислом цивилизацияси марказини кўздан кечирар экан, уни нафақат мазмуни, балки кўлами, салобати ва маконларнинг ўзаро уйғунлиги билан ажралиб турадиган ноёб мажмуа сифатида баҳоладилар. Уларнинг фикрича, мақсаднинг пухта режалаштирилгани, ички ва ташқи маконлар ўртасидаги мантиқий боғлиқлик ҳамда йирик ҳажмлар билан ишлашдаги аниқлик лойиҳа сифатини юқори даражага кўтарган.
Ташриф давомида меҳмонлар Марказ экспозицияларида Марказий Осиё тарихининг асосий босқичлари — исломдан аввалги давр, ислом цивилизациясининг шаклланиши, Биринчи ва Иккинчи Ренессанс ҳамда Янги Ўзбекистон тараққиёт жараёнлари изчил ва яхлит тарзда ёритилганига эътибор қаратдилар.
Уларнинг фикрича, Марказда минг йиллик артефактлар билан бир қаторда кейинги асрларга мансуб экспонатларнинг бир маконда жамлангани тарихий узлуксизликни яққол намоён этади. Замонавий технологиялар ва сунъий интеллект асосидаги экспозиция эса ташриф буюрувчилар учун мазмунни чуқурроқ англаш имконини яратган.
Айдин Раҳимбаев, BI-Group компанияси бошқарув раиси:
Бу марказ ҳақида жуда кўп эшитган эдим ва ниҳоят бу ерга келишга муваффақ бўлдим. Жуда катта таассурот қолдирди.
Бир томондан, қамровининг кенглиги, иккинчи томондан эса мазмунининг чуқурлиги билан ҳайратга солади.
Мен тарихни жуда яхши кўраман ва бу марказнинг мазмун-моҳияти, экспонатлари билан чуқур ҳайратга солди. Чунки, менинг назаримда, бу Марказ бугунги кунда айнан формати ва мазмуни жиҳатидан Марказий Осиёдаги энг рамзий, энг муҳим масканлардан бири.
Барча экспонатлар ниҳоятда қизиқарли ва экспозицияларнинг чуқур ўйлаб ишлаб чиқилгани ҳам ҳайратланарли. Айниқса, буларнинг барчаси сунъий интеллект ёрдамида бойитилгани алоҳида эътиборга лойиқ. Бу, албатта, бефарқ қолдирмайди.
Бу ерда заллар жуда кўп ва таъсир жуда катта. Чунки бизнинг мамлакатларимиз чегаралари 200 йил аввал ҳам, 1000 йил аввал ҳам, 2000 йил аввал ҳам бугунгидек бўлмаган. Шу сабабли бу ерда кўрсатилган ҳар бир экспозиция қалбимизга яқин — булар бизнинг илдизларимиз, Марказий Осиё халқларининг умумий илдизлари.
Делегация аъзоларининг таъкидлашича, Марказ экспозицияларида тарихий чегаралардан қатъи назар, Марказий Осиё халқларини бирлаштириб турувчи умумий илдизлар ва цивилизацион жараёнлар яққол акс этган. Бу ерда тарих ахборот эмас, балки макон орқали англанадиган жонли тажриба сифатида намоён бўлади.
