ЎзЖОКУ ректори: “Қоронғилик кетиб, Ренессанс нури кириб келмоқда”
Ўзбекистон журналистика ва оммавий коммуникациялар университети (ЎзЖОКУ) профессор-ўқитувчилари Ислом цивилизацияси марказига ташриф чоғида аждодлар мероси қандай қилиб замонавий музей тилида “сўзлай олиши”га гувоҳ бўлдилар.
ЎзЖОКУ профессор-ўқитувчилари делегацияси Ўзбекистондаги Ислом цивилизацияси марказига ташриф буюрди. Делегацияга университет ректори Шерзодхон Қудратхўжа раҳбарлик қилди. Меҳмонларни Марказ директори кутиб олиб, уларни экспозициялар билан яқиндан таништирди.
Делегация дастлаб Марказнинг “Шон-шараф зали”даги мозакаларни томоша қилди. Ушбу экспозиция орқали буюк аждодларимизнинг жаҳон илм-фани ва маданияти тараққиётига қўшган улкан ҳиссаси бадиий ифодада намоён этилган. Залдаги панноларнинг ранглар уйғунлиги ва бадиий ечими меҳмонларда катта қизиқиш уйғотди.
Шундан сўнг делегация Исломдан аввалги давр, Биринчи ва Иккинчи Ренессанс ҳамда “Янги Ўзбекистон – янги Ренессанс пойдевори” бўлимлари билан танишди. Экспозицияларда мамлакат ҳудудидаги қадимий цивилизация ривожи, илм-фан ва маданиятнинг тарихий босқичлари, шунингдек, замонавий Ўзбекистондаги маънавий-маърифий ислоҳотлар кенг ёритилган.
Ташриф давомида Ислом цивилизацияси марказининг замонавий музей технологиялари, рақамли платформалар ва сунъий интеллект элементлари асосида ташкил этилган экспозициялари алоҳида эътиборга сазовор бўлди. Бу ёндашув тарихий меросни кенг жамоатчиликка, айниқса ёш авлодга замонавий ва интерактив шаклда етказишга хизмат қилади.
Бизнинг боболаримиз бошқалар ҳали китоб ўқишни билмаган даврлардаёқ китоб ёзган, илм-фан билан шуғулланган даҳолар бўлган. Аждодларимиз дунёдаги энг ноёб устурлоб ва илмий асбоблар орқали осмон жисмларининг ҳаракатини ҳисоблаб, ҳозирги замонавий компьютерлар билан таққослаганда кичик секундгагина фарқ қилган натижаларга эришган. Бу уларнинг беқиёс илмий салоҳияти ва зеҳнини кўрсатади.
Бу лойиҳа Президент ташаббуси билан амалга оширилган бўлиб, бутун Турон ва Осиё заминида, Ислом цивилизацияси тараққиётида олимларимиз тутган ўрнини ёритишга хизмат қилади. Америкалик профессор Фредерик Стар таъкидлаганидек, “Ўзбекистон тарихи қоронғи хонада ётган эди”, бугун эса қоронғилик кетиб, Ренессанс нури кириб келмоқда ва янги тарихий саҳифалар очилмоқда, - деди ЎзЖОКУ ректори Шерзодхон Қудратхўжа.
Профессор-ўқитувчилар шунингдек, экспозицияда ёшлар учун яратилган интерактив лойиҳалар билан ҳам танишди. Университет ректори Иккинчи Ренессанс бўлимида жойлаштирилган сунъий интеллект ёрдамида “жонлантирилган” Темурий шаҳзода Улуғбек Мирзо билан мулоқот қилди. Ундан бобоси Амир Темур ва Сароймулкхоним билан боғлиқ хотиралари ҳақида сўради. Мирзо Улуғбек эса бу саволга батафсил жавоб берди. Бу эса профессор ўқитувчиларда ҳам катта қизиқиш уйғотиб, ёш авлодга тарихни бугунги замонавий “тил”да тақдим этилгани эътироф этилди.
Шунингдек, ташриф чоғида ЎзЖОКУ ва Ислом цивилизацияси маркази ўртасида илмий-маърифий ҳамкорликни ривожлантириш, талабалар ва профессор-ўқитувчилар учун амалий машғулотлар, экскурсиялар ҳамда қўшма лойиҳаларни ташкил этиш масалалари муҳокама қилинди. Жумладан, гид-журналистика, саёҳат-журналистикаси ва тарихга ихтисослашган журналистика йўналишларини ривожлантириш бўйича истиқболли режалар белгилаб олинди.
ЎзЖОКУ Инсон ҳуқуқлари ва медиа кафедраси мудири, профессор Назира Тошпўлатова Марказдаги технологик ёндашув ва учинчи Ренессанс ғоясининг амалий ифодасини алоҳида эътироф этди:
“Бу музейнинг ўқ томири — технология. Сунъий интеллект ёрдамида аждодларимиз билан мулоқот қилиш имконияти яратилган. Бу ерда учинчи Ренессанснинг тасаввуринигина эмас, балки унинг амалиётини кўрдим. Тарих бу ерда жонли воқеа сифатида ҳикоя қилинади, одам зерикмайди ва ўзга керакли маънавий жавобларни топади.”
Ташриф якунида Ислом цивилизацияси маркази Ўзбекистоннинг бой тарихий, илмий ва маънавий меросини замонавий ёндашув асосида тарғиб этувчи ноёб илмий-маърифий макон экани таъкидланди.