Янгиликлар

CNN ва Euronews вакиллари 24–28 август кунлари Тошкент ва Самарқанд шаҳарларида бўлиб ўтадиган «Ислом цивилизацияси: янги нигоҳ — янги кашфиётлар» халқаро медиафорумида иштирок этади.

25 август куни Euronews телеканалининг бош директори ва таҳририят директори Клаус Штрунц медиафорумда «Янги ҳамкорлик: маданият, медиа ва ғоялар орқали Европа ва Марказий Осиёни бирлаштириш — Ислом цивилизацияси маркази глобал ахборот маконида» мавзусида махсус маъруза билан иштирок этади.

CNN вакили Паула Ханкокс медиафорумнинг ялпи сессия модераторларидан бири бўлади. Шунингдек, мазкур медиафорумда CNN International Commercial ижрочи вице-президенти Фил Нельсоннинг махсус видеомурожаати ҳам намойиш этилиши режалаштирилган.

CNN International Commercial минтақавий вакили Имрон Аҳмад «Ўзбекистондаги Ислом цивилизацияси маркази — буюк мероснинг янги таянч нуқтаси» номли ялпи сессия доирасида «CNN Ўзбекистонни кашф этмоқда: ислом цивилизацияси мероси асосий йўналишга айланганида» мавзусида махсус маъруза билан иштирок этади. 

Форум дастуридан тарихий ва маданий меросни халқаро медиа маконида замонавий форматларда тақдим этиш масалаларига бағишланган маърузалар ва муҳокамалар ўрин олган.

Форумнинг асосий майдони Ўзбекистондаги Ислом цивилизацияси марказида бўлади. Унда қарийб 50 мамлакатдан 300 нафар медиа ва экспертлар ҳамжамияти вакиллари — медиакомпаниялар, ахборот агентликлари ва телеканаллар раҳбарлари, журналистлар, продюсерлар, олимлар ҳамда креатив индустрия мутахассислари иштирок этади.