Аввало, ушбу Марказга илк бор ташриф буюраётганим мен учун катта шараф ва улкан мамнуният эканини таъкидламоқчиман. Бугун кўрганларим чиндан ҳам ҳайратланарли таассурот қолдирди. Ҳеч иккиланмасдан айта оламанки, бу инсоният томонидан сўнгги ўн йилликларда яратилган энг яхши музейлардан биридир.

Бу маскан нафақат Тошкент, Ўзбекистон ёки Марказий Осиё, балки бутун инсоният учун рамзий аҳамиятга эга бўлган ноёб жойдир. Бу ерда ниҳоятда бой меросга эга мамлакат тарихи ўз аксини топган. Энг муҳими эса, сиз бу тарихнинг ўтмишдан бугунги кунгача узвий давом этаётганини ҳис қиласиз. Мамлакат ўз келажагини аниқ тасаввур қилаётгани ва уни бугуннинг ўзида барпо этаётганини англайсиз.

Дунё аҳли ҳали Ўзбекистон ҳақида жуда кўп янги жиҳатларни кашф этиши керак. Буюк ипак йўлининг Шарқ ва Ғарб чорраҳасида жойлашган ушбу юрт кўпчилик учун гўё орзулар мамлакатидай туюлади. Одамлар Самарқанд ва Бухоро ҳақида орзу қилади, бироқ уларни ўз кўзи билан кўриш ҳамма учун ҳам насиб этмаган.

Менимча, ушбу Марказ инсонни мамлакат тарихининг турли даврлари бўйлаб саёҳат қилдиради ва буларнинг барчасини ягона маконда кўрсатиб беради. Агар кимдир Ўзбекистон билан илк танишаётган бўлса, саёҳатини айнан шу ердан бошлаши керак. Агар Самарқанд, Бухоро ва бошқа шаҳарларда бўлиб улгурган бўлса, сафарини айнан шу Марказда якунлагани маъқул. Чунки бу ерда мамлакат тарихининг яхлит манзараси жамланган.

Шунингдек, бу Марказ келажак авлодлар учун ҳам илҳом манбаига айланишига ишонаман. Бу ерда кўплаб болаларни кўрдик ва бу жуда муҳим. Ҳеч бир давлат ўз тарихини англамасдан ва ҳурмат қилмасдан келажак қура олмайди. Айнан шундай масканлар инсониятга ўтмишдан сабоқ олиб, келажак учун мустаҳкам пойдевор яратишга ёрдам беради.