Ўзбекистонда ўтказилаётган Ислом цивилизацияси бўйича биринчи халқаро форум бугунги замонавий таҳдидлар юзасидан олимлар ва мутафаккирларни бирлаштириш учун муҳим имкониятдир.

Менинг фикримча, Ўзбекистон ислом оламига янги намуна кўрсатди. Мамлакат ислом цивилизациясини тиклаш ва унинг бой меросини асраб-авайлаш борасида муҳим қадамларни амалга оширмоқда.

Албатта, Ўзбекистон замини илм-фан, тафаккур ва буюк алломалар юртидир. Ислом тарихидаги кўплаб машҳур олимлар ва имомлар айнан Мовароуннаҳр заминида — Бухоро, Термиз ва Самарқанд каби шаҳарларда етишиб чиққан. Бу муқаддас заминлар ислом умматига беқиёс ҳисса қўшган.

Шу муносабат билан Ўзбекистон Республикаси Президенти муҳтарам Шавкат Мирзиёевга, Ўзбекистон Ҳукуматига, ўзбек халқига ҳамда мазкур форумни юқори савияда ташкил этган Ўзбекистондаги Ислом цивилизацияси марказига самимий миннатдорчилигимни билдираман.

Мальдив Республикаси ва Ўзбекистон ислом оламига мансуб давлатлар бўлиб, ҳар иккиси ҳам Ислом ҳамкорлик ташкилоти аъзосидир. Билишимча, кўплаб ўзбекистонлик ёшлар ва сайёҳлар Мальдив Республикасига дам олиш учун ташриф буюришади. Мамлакатимиз туризм соҳасида дунёга машҳур ва биз уларни ҳар доим мамнуният билан кутиб оламиз.

Биз ҳам Ўзбекистонга ташриф буюришни жуда истаймиз. Ўзбекистон гўзал табиати, бой тарихи ва юксак цивилизацияси билан ажралиб туради. Иншоаллоҳ, биз Мальдив Республикасида ҳам Ўзбекистоннинг туризм салоҳиятини кенг тарғиб қиламиз.

Албатта, Мальдив Республикаси ҳамиша диний мутаассиблик, такфирчилик ва терроризмга қарши қатъий позицияда бўлиб келган. Мен Ўзбекистондаги биродарларимизга ҳам исломнинг мўътадиллик йўлини маҳкам тутишни тавсия қиламан. Бу йўл бағрикенглик, муроса ва динда ҳаддан ошмасликка чақиради.

Аллоҳ таоло Қуръони каримда: «Сизларни ўрта уммат қилдик, токи одамларга гувоҳ бўлгайсизлар», деб марҳамат қилади. Биз эзгуликка, тинчликка ва бағрикенгликка чақирувчи умматмиз. Ислом — тинчлик динидир. Биз бир-биримиз билан учрашганда ҳам «Ассалому алайкум» деб саломлашамиз. Бу эса тинчлик, хавфсизлик ва омонлик тилагини англатади.

Шунинг учун барчамиз мусулмон сифатида экстремизм, диний мутаассиблик ва терроризмга қарши биргаликда курашишимиз лозим. Терроризм ислом динида қатъий тақиқланган.