Хорижий ОАВ биз ҳақимизда

Euronews нашри Ўзбекистонда мусулмон оламининг энг муқаддас зиёрат масканларидан бири ҳисобланган Имом ал-Бухорий ёдгорлик мажмуасининг кенг кўламли қайта тикланишини ёритди. Материалда Самарқанд яқинида жойлашган ушбу зиёратгоҳнинг асрлар давомидаги тарихий аҳамияти, буюк муҳаддис Имом ал-Бухорий меросига бўлган эҳтиром, шунингдек, анъанавий меъморчиликни замонавий инфратузилма билан уйғунлаштирган ҳолда яратилган янги мажмуа дунё миқёсидаги зиёрат ва маънавий маскан сифатида тақдим этилган.

Euronews ва CNN телеканаллари халқаро “Маърифат акс-садоси” лойиҳаси доирасида Ўзбекистоннинг ўн нафар буюк шахсиятига бағишланган видеороликлар туркумининг бўлажак намойишини эълон қилди.

AhlulBayt News Agency (ABNA) нашри Ўзбекистонда ташкил этилган Ислом цивилизацияси марказини ислом меросини қайта англаш ва миллий тарихий-маданий қадриятларни асраб-авайлашга қаратилган йирик маданий-маърифий лойиҳа сифатида ёритди. Материалда Марказнинг халқаро таълимий ва маданий макон сифатидаги ўрни, ЮНЕСКО рўйхатига киритилган Усмон мусҳафи сақланаётган Қуръон зали, замонавий рақамли экспозициялар орқали Ўзбекистон тарихининг исломдан олдинги даврдан то “Янги Ўзбекистон” босқичигача бўлган манзарасини намоён этишдаги аҳамияти кенг ёритилган.

CNN World нашри Тошкент шаҳрида очилиши арафасида турган Ислом цивилизацияси марказини Янги Ўзбекистонда амалга оширилаётган энг йирик маънавий-маърифий лойиҳалардан бири сифатида ёритди. Материалда Марказнинг ислом меросини замонавий талқинда намоён этишга қаратилган концепцияси, унинг меъморий ечими, нодир қўлёзмалар ва артефактларни асраб-авайлашдаги ўрни, шунингдек, илм-фан, таълим ва маданиятни бирлаштирган халқаро интеллектуал майдон сифатидаги аҳамияти кенг ёритилган.

CNN нашри Ўзбекистонда барпо этилаётган Ислом цивилизацияси маркази ва унинг Марказий Осиёдаги маънавий-маърифий меросни тиклашдаги аҳамияти ҳақида мақола чоп этди. Материалда марказнинг VIII–XIII асрларда ҳозирги Ўзбекистон ва атроф ҳудудларда шаклланган илмий-маърифий анъаналарни сақлаш ва кенг тарғиб қилишдаги ролини, Биринчи халқаро конгрессда минтақавий олимлар, тадқиқотчилар ва маданий намояндаларни бирлаштирганини, шунингдек, нодир қўлёзмалар ва бебаҳо артефактлар орқали замонавий дунёда Ўзбекистоннинг нуфузини оширишга қаратилган саъй-ҳаракатлар кенг ёритилган.