BMTda tarixiy taqdimot o‘tkaziladi
BMT Bosh Assambleyasining 80-sessiyasida O‘zbekiston Prezidenti Shavkat Mirziyoyev tomonidan qator muhim taklif va tashabbuslar ilgari surilgan. Ushbu tashabbuslar qatorida BMTda maxsus taqdimot o‘tkazish ham o‘rin olgan. Ushbu tashabbuslarni amalga oshirish maqsadida joriy yilning 22-oktyabr kuni O‘zbekiston Respublikasi hamda Amerika Qo‘shma Shtatlari o‘rtasidagi hamkorlik samaradorligini oshirishga qaratilgan chora-tadbirlar to‘g‘risida PQ–314-son qaror qabul qilingan. Mazkur qaror ilovasiga ko‘ra BMTda O‘zbekistondagi Islom sivilizatsiyasi markazi hamda buyuk allomalar merosiga bag‘ishlangan maxsus taqdimot o‘tkazish vazifasi belgilangan.
Markaz direktori Firdavs Abduxoliqov rahbarligida Imom Buxoriy xalqaro ilmiy-tadqiqot markazi direktori Shovosil Ziyodov, Imom Moturidiy xalqaro ilmiy-tadqiqot markazi direktori Komiljon Shermuhammedov, Imom Termiziy xalqaro ilmiy-tadqiqot markazi direktori Muzaffar Joniyev hamda Markaz xodimlari ishtirokida bo‘lib o‘tgan yig‘ilishda ana shu vazifani amalga oshirish masalalari ko‘rib chiqildi.
Markaz direktori F.Abduxoliqov o‘tgan vaqt mobaynida mazkur taqdimot konsepsiyasi ishlab chiqilganini ma’lum qildi. Shu munosabat bilan, ushbu yo‘nalishda tezkor fursatda amalga oshirilishi lozim bo‘lgan chora-tadbirlar rejasini ishlab chiqish, taqdimotni o‘tkazish bilan bog‘liq ishlar yuzasidan tegishli ma’lumotnoma tuzish zarurligi belgilandi.
Shu bilan birga, Islom sivilizatsiyasi markazi tomonidan buyuk allomalar — Imom Moturidiy, Imom Buxoriy va Imom Termiziy ilmiy-ma’naviy merosiga bag‘ishlangan maxsus ekspozitsiyalar tashkil etilgani, shuningdek, Gollivudning mashhur kinoaktyori Ben Kingsli ishtirokida “Ma’rifat aks-sadosi” nomli turkum videoroliklar tayyorlangani ta’kidlandi.
Bundan tashqari, Rossiya musulmonlari diniy boshqarmasi bilan hamkorlikda Imom Termiziy hayoti va faoliyatiga bag‘ishlangan “Dostoinstva Proroka” kitobi tayyorlangani, Imom Buxoriy hayoti va ilmiy merosiga bag‘ishlangan kitob-albom tayyorlanayotgani, shuningdek, Imom Moturidiy va boshqa allomalarga bag‘ishlangan kitob-albomlar tayyorlash zarurligi qayd etildi.
Nufuzli xorijiy ommaviy axborot vositalari — Euronews, CNN, BBC va boshqa kinokompaniyalar bilan hamkorlikda Markaz faoliyatiga oid turkum videoroliklar tayyorlanayotgani ma’lum qilindi.
Imom Moturidiy xalqaro ilmiy-tadqiqot markazi direktori Komiljon Shermuhammedov taqdimot konsepsiyasini mukammal tarzda ishlab chiqish hamda boshqa barcha zarur chora-tadbirlarni amalga oshirish maqsadida Markazlar (Imom Buxoriy, Imom Moturidiy va Termiziy)dan vakillarni jalb etgan holda alohida ishchi guruh shakllantirish zarurligini ta’kidladi.
Imom Buxoriy xalqaro ilmiy-tadqiqot markazi direktori Shovosil Ziyodov taqdimotga qisqa fursatda tayyorgarlik ko‘rish zarurligini inobatga olgan holda, ilmiy jihatdan asoslangan materiallar asosida ma’lumotlarni shakllantirish maqsadga muvofiqligini ta’kidladi.
Firdavs Abduxoliqovning ta’kidlashicha, mazkur taqdimotni tashkillashtirishda Buyuk Britaniyadagi Islom merosi fondi – “Al-Furqon” hamda Oksford islom tadqiqotlari markazini hamkor sifatida jalb etish maqsadga muvofiq.
Shuningdek, yig‘ilish davomida Ramazon oyi munosabati bilan ilmiy tadqiqot markazlari hamkorligida mahalliy telekanallar orqali maxsus ma’rifiy roliklar tayyorlash masalasi ham ko‘rib chiqildi. Ushbu roliklarni tayyorlash, ko‘rikdan o‘tkazish va tasdiqlash uchun O‘zbekistondagi Islom sivilizatsiyasi markazida Imom Buxoriy, Imom Termiziy, Imom Moturidiy hamda Islom sivilizatsiyasi markazi xodimlaridan iborat maxsus ishchi guruh tuzish bo‘yicha kelishib olindi.
O‘zbekistondagi Islom sivilizatsiyasi markazining bu tashabbusi nafaqat tarix va madaniy merosni keng auditoriyaga yetkazish, balki mamlakatning xalqaro maydondagi nufuzini yanada mustahkamlashga qaratilgan muhim loyihalardan biri hisoblanadi. BMTdagi maxsus taqdimot va telekanallar orqali tayyorlanadigan ma’rifiy kontent O‘zbekistonning boy ilmiy va madaniy merosini jahon hamjamiyatiga ta’sirli va yanada yaqqol tarzda namoyon qilish imkonini beradi.
