Saytning test versiyasi
Shavkat Mirziyoyev, O‘zbekiston Respublikasi Prezidenti
Islom sivilizatsiyasi markazi — Oltin asr va Yangi O‘zbekiston o‘rtasidagi ko‘prikdir. U boy ma’naviy va ilmiy merosni mamlakatning zamonaviy intilishlari bilan bog‘laydi. Bu yerda o‘tmish kelajakni ilhomlantiradi, bilim va taraqqiyot makonini yaratadi.
Zalda 14 ta ravoq joylashgan bo‘lib, ularda Markaziy Osiyo xalqlari tarixidagi muhim voqealar tasvirlangan. Bu yerda zamonaviy texnologiyalar tarixni tirik muloqotga aylantiradi. Interaktiv sensor panellar orqali Prezident tashabbusi bilan yaratilgan raqamli platformaga kirish mumkin — u yuzdan ortiq buyuk mutafakkir va olimlarning avatarlarini o‘z ichiga oladi. Ular ekranlarda “jonlanib”, o‘z g‘oyalari va kashfiyotlari haqida so‘zlaydi.
Qur’on zali — butun muzeyning konseptual va me’moriy markazi bo‘lib, dunyoda saqlanib qolgan eng qadimiy Qur’on nusxasi atrofida barpo etilgan. Bu muqaddas matn — kiyik terisiga yozilgan VII asrga oid qo‘lyozma bo‘lib, UNESCO’ning “Jahon xotirasi” ro‘yxatiga kiritilgan.Zal majmuaning markazida joylashgan bo‘lib, u ruhiy markaz sifatida xizmat qiladi. Bu yerda dunyodagi eng qadimiy muqaddas qo‘lyozmalardan biri — Usmon Qur’oni (roziyallohu anhu) ehtirom bilan saqlanadi. Asosiy qo‘lyozmadan tashqari, zalda 114 sura asosida yaratilgan Qur’on qo‘lyozmalari namoyish etilgan.
Bu zalda Sugʼd davri madaniyatiga oid artefaktlar, sanʼat asralari, tekstil mahsulotlari, xalq amaliy sanʼati buyumlari joylangan. Dunyodagi mashhur muzeylar va shaxsiy kollektsiyalarda oʼrin olgan tarixiy Sugʼd oʼlkasiga aloqador koʼplab buyumlar: kiyim-kechaklar, haykal va haykalchalar, sopol va metall idishlar, qurol-yarogʼlar, tanga va muhrlarni endi Markaz ekspozitsiyasida koʼrish mumkin.
Birinchi Renessans davri bo'limi “Bag‘rikenglik” maydoni O‘zbekiston hududida asrlar davomida shakllangan diniy, madaniy va ilmiy bag‘rikenglik an’analarini mujassam etadi. Ushbu maydon ekspozitsiyasida Markaziy Osiyo va islom sivilizatsiyasi tarixida muhim o‘rin tutgan me’moriy obidalar, muqaddas ramzlar va noyob yodgorliklar jamlangan. Maydonda Raboti Malik majmuasi, Mag‘oki Attori masjidi, Chashmai Ayub maqbarasi, Somoniylar maqbarasi va Qusamiya madrasasi maketlari o'rin olgan.
Zalda temuriylar davri ilm-fani va maʼnaviy yuksalish ruhi zamonaviy muzey texnologiyalari bilan uygʻun holda namoyon etilgan. Meʼmoriy bezaklardagi nafis koshinkorlik, Qurʼon oyatlari va mumtoz naqshlar Sharq uygʻonish davrining badiiy-estetik tafakkurini ifodalaydi.Ekspozitsiyalarda Alisher Navoiy siymosi, uning adabiy-falsafiy merosi, qoʻlyozmalar va sanʼat asarlari orqali Ikkinchi Renessansning ilmiy, madaniy va maʼnaviy qiyofasi jonli tarzda ochib berilgan.
2017 yildan boshlab O‘zbekiston taraqqiyotida yangi davr boshlandi. Prezident Shavkat Mirziyoyev tashabbusi bilan Yangi O‘zbekiston va Uchinchi Renessans g‘oyasi izchil amalga oshirilmoqda. Ekspozitsiyaning markazida joylashgan ushbu stela zamonaviy shisha installyatsiya ko‘rinishida yaratilgan bo‘lib, mamlakatning yangilanish va taraqqiyot ruhini ifodalaydi. LED ekranlarda namoyish etiladigan videolavhalarda tarixiy meros, bugungi islohotlar va kelajakka intilish badiiy tarzda aks ettiriladi.
Islom sivilizatsiyasi markazidagi Bolalar ekspozitsiyasi yosh avlodni o‘qitish, qiziqtirish va ilhomlantirishga xizmat qiladigan zamonaviy ta’limiy makon sifatida tashkil etilmoqda. U bolalarni O‘zbekistonning boy madaniy merosi, milliy o‘zligi hamda tarixdagi buyuk allomalar hayoti va g‘oyalari bilan tanishtiradi. Immersiv va o‘yinli muhit bilim berish bilan birga, tashrif buyuruvchilarning Markaz haqidagi taassurotlarini boyitadi. Interaktiv tajribalar orqali loyiha yosh mehmonlarni tarix va ilm uyg‘unligiga chorlab, keng auditoriyani jalb etadi hamda kelajak avlodda milliy g‘urur va madaniyatga faxr tuyg‘usini mustahkamlaydi.
O‘zbekistondagi Islom sivilizatsiyasi markazining qariyb 300 o‘ringa mo‘ljallangan kutubxonasi zamonaviy ilmiy-ma’rifiy maskan hisoblanadi. U 3105 kvadrat metr maydonni egallab, unda qadimiy qo‘lyozmalar, ilmiy, badiiy, tarixiy va madaniy-ma’rifiy asarlar hamda nodir nashrlar jamlangan bo‘lib, kutubxona tadqiqotchilar va keng kitobxonlar uchun qulay muhit yaratadi hamda milliy va jahon ma’naviy merosini o‘rganishga xizmat qiladi.
Paragvay prezidenti
Oʻzbekiston tarixi haqiqatan ham beqiyos. U besh ming yillik taraqqiyotni oʻz ichiga olgan ulkan sivilizatsiyadir. Bir millatni anglash uchun uning tarixini bilish kerak, bu yerda esa tarix juda boy. Insoniyat sivilizatsiyasiga ulkan hissa qoʻshgan koʻplab ilmiy va madaniy yutuqlar aynan shu zamindan kelib chiqqan.
Qozog‘iston Respublikasi prezidenti
Ayni paytda xalqlarimizning o‘ziga xos tarixiy-madaniy merosiga asoslangan mintaqaviy o‘ziga xoslikni mustahkamlash alohida ahamiyat kasb etadi. Biz Islom sivilizatsiyasi markazini ziyorat qildik. Bu ulkan va noyob inshootdir. Darhaqiqat, bu ilmiy, turistik va etnomadaniy loyihadir.
Serbiya Prezidenti
Men sizning Prezidentingizni va mamlakatingizni ana shunday muhtasham majmua ishga tushayotgani bilan tabriklamoqchiman. Avvalo bizga ushbu muhtasham markaz bilan yaqindan tanishish imkoni berilgani uchun minnatdorlik bildiraman.
Finlyandiya Prezidenti
Rostini aytsam, bu yerda men beqiyos taassurotlar girdobiga tushib qoldim. Har bir ekspozitsiya, har bir zal, har bir detal chuqur oʻylangan. Uch ming yillik tarixni bugungi avlodga shu darajada zamonaviy shaklda yetkazib berish — bu yuksak sanʼat va buyuk mahorat talab etadi.
Ozarbayjon Respublikasi Prezidenti
Ayrim mamlakatlarda dinimizga nisbatan xurujlar kuchayib, islomofobiya tizimli tus olayotgan bir paytda, Islom sivilizatsiyasi markazining ochilishi butun dunyoga islom — bunyodkorlik, bag‘rikenglik, do‘stlik va birodarlik dini ekanini namoyon etadi. Islom olamining buyuk namoyandalari jahon ilmi va madaniyatiga ulkan hissa qo‘shgan, Islom sivilizatsiyasi markazi buni yaqqol ko‘rsatib turibdi. Ishonchim komilki, Toshkentdagi salobati va ekspozitsiyasi jihatidan noyob bo‘lgan Islom sivilizatsiyasi markazi butun islom olamining faxr-iftixoriga aylanadi
Rossiya Federatsiyasi Boshqirdiston Respublikasi rahbari
Men bir necha yildan beri Oʻzbekistonda bunday ulkan Islom sivilizatsiyasi markazi barpo etilayotgani haqida eshitib yurganman. Taxminan olti oy avval bino tashqi koʻrinishini koʻrganimda ham hayratga tushgan edim. Ammo hozir bu yerning ichki mazmunini koʻrib, oʻsha taassurotlarim yanada chuqurlashdi.
Ozarbayjon Respublikasi Prezidentining yordamchisi
Oʻzbekistondagi Islom sivilizatsiyasi markazi faoliyati bilan yaqindan tanishib, qisqa muddatda erishilgan natijalarga guvoh boʻldik. Nega ʼqisqa muddatʼ deyman? Chunki ekspozisiyalar boʻylab yurganingizda, bunday ulkan ishlarni yaratish uchun odatda oʻnlab yillar talab etiladi, degan fikr oʻz-oʻzidan paydo boʻladi.
Xalqaro avtomobil federatsiyasi (FIA) Prezidenti
Oʻzbekiston hukumati va shaxsan Prezidentga bu Markazni oʻz koʻzimiz bilan koʻrish imkonini bergani uchun chin dildan minnatdorlik bildiraman. Bu yerda ilgari bilmagan koʻplab maʼlumotlarni koʻrdim. Menimcha, bu Oʻzbekistonning yashirin xazinasi.
Polsha qishloq xoʻjaligi vaziri
Bu yerda uchta renessans — Oʻzbekistonning bugungi qiyofasiga taʼsir koʻrsatgan jarayonlar va buyuk insonlar yaratgan meros — bularning barchasi aniq va ixcham tarzda namoyish etilgan. Insoniyatni yangi yoʻnalishga boshlagan dastlabki oʻzgarishlar, ulkan siljishlar bu yerda yoritilgan va ularning ahamiyati beqiyos
Yevropa Ittifoqining Xalqaro sherikliklar boʻyicha komissari
Men juda hayratdaman. Fikrimcha, bu juda zamonaviy va taʼlimiy yondashuv orqali nafaqat mamlakatingiz tarixini, balki islom tarixini ham keng jamoatchilikka tanishtirishning eng zoʻr usuli.
ICESCOning Bokudagi mintaqaviy ofisi rahbari oʻrinbosari
Sizning goʻzal yurtingizga tashrifimiz doirasida Islom sivilizatsiyasi markaziga kelish imkoniga ega boʻldik. Mazkur noyob markaz Oʻzbekiston Prezidenti Shavkat Mirziyoyevning ilm-maʼrifat va madaniy merosni rivojlantirish borasidagi yuksak eʼtiborining amaliy ifodasi boʻlib, biz bu yerda birinchi marotaba boʻldik. Delegatsiya nomidan aytsam, koʻrganlarimiz bizni nihoyatda hayratda qoldirdi — ekspozitsiyalar juda did bilan joylashtirilgan, mazmunan juda qiziqarli va oʻziga xos.
Yevropa Ittifoqining Kengayish masalalari boʻyicha komissari
Bunday Markazni tasavvur ham qila olmasdim. Oʻz tarixingiz va bugungi hayotingizda muhim boʻlgan barcha jihatlarni shu qadar taʼsirli tarzda namoyish etayotganingiz meni chin dildan hayratga soldi. Bu markazni koʻrayotganimdan juda mamnunman va bu men uchun katta sharaf. Yana shuni qoʻshimcha qilmoqchimanki, siz bilganingizdek, Islom sivilizatsiyasi markazining bunyod etilishi Oʻzbekiston Prezidenti Shavkat Mirziyoyev tashabbusi bilan amalga oshirilgan.
“Formula-1” yulduzi
Bu yerda koʻrganlarim — haqiqatan ham aql bovar qilmaydigan darajada hayratlanarli. Men bugun guvoh boʻlgan manzaralarni boshqa hech qayerda uchratmaganman. Markaz ichidagi har bir detal, har bir boʻlimga berilgan eʼtibor — nihoyatda nafis va aniq maqsadli tashkillashtirilgan.
