Yangiliklar

Qirg‘izistonning 24.kg nashri O‘zbekistondagi Islom sivilizatsiyasi markazining ochilishiga bag‘ishlangan materialni e’lon qildi. Unda ta’kidlanishicha, Toshkentda barpo etilgan mazkur markaz mamlakatning eng yirik ma’naviy-ma’rifiy va ilmiy loyihalaridan biri bo‘lib, u O‘zbekistonning ko‘p ming yillik tarixi, boy madaniy merosi va jahon sivilizatsiyasiga qo‘shgan hissasini kompleks tarzda namoyon etuvchi muhim ilmiy va madaniy makon sifatida baholanmoqda.

Toshkentda Islom sivilizatsiyasi markazi ochildi. Tantanali marosimda mamlakat prezidenti Shavkat Mirziyoyev ishtirok etdi, deya uning matbuot xizmati xabar berdi.

Davlat rahbari ta’kidlashicha, O‘zbekiston muborak Ramazon kunlarini tinchlik, barqarorlik va jamiyatdagi hamjihatlik sharoitida qarshi olmoqda. Shu bilan birga, zamonaviy tahlikali davrda tinchlik va ichki barqarorlikning ahamiyati yanada chuqurroq anglanmoqda.

Prezident matbuot xizmati qayd etishicha, Islom sivilizatsiyasi markazi respublikadagi eng yirik ma’naviy-ma’rifiy va ilmiy loyihalardan biri sifatida qaralmoqda. U xalqning uch ming yillik tarixini, intellektual salohiyatini, madaniy chuqurligini va jahon sivilizatsiyasiga qo‘shgan hissasini aks ettiradi. Shavkat Mirziyoyev bunday markazni barpo etish ko‘p avlodlarning orzu-intilishlari ifodasi ekanini, shuningdek milliy merosni asrab-avaylash, o‘rganish va keng targ‘ib etishda muhim qadam bo‘lganini ta’kidladi.

Uning so‘zlariga ko‘ra, mamlakatda amalga oshirilayotgan siyosatning asosida ilm-fan va ta’lim ustuvorligi yotadi. Chunki aynan bilim, ma’rifat va inson salohiyatini rivojlantirish orqali kuchli davlat va erkin jamiyatni barpo etish mumkin.

Islom sivilizatsiyasi markazini tashkil etish tashabbusi prezident tomonidan BMT Bosh Assambleyasining 72-sessiyasida ilgari surilgan bo‘lib, xalqaro hamjamiyat, ayniqsa islom olami tomonidan qo‘llab-quvvatlangan.

Natijada Toshkentdagi Hazrati Imom majmuasi yonida milliy badiiy an’analar, zamonaviy infratuzilma va keng ko‘lamli ilmiy-madaniy konsepsiyani o‘zida mujassam etgan yirik me’moriy ansamblь shakllantirildi.

Islom sivilizatsiyasi markazi qariyb 10 gektar hududda joylashgan bo‘lib, uning binolarining umumiy maydoni 50 ming kvadrat metrga yaqinni tashkil etadi. Majmua ichida O‘zbekiston hududidagi islomgacha bo‘lgan davr, Birinchi va Ikkinchi Renessans davrlari hamda Uchinchi Renessans poydevori sifatida Yangi O‘zbekistonga bag‘ishlangan keng ekspozitsiya maydonlari yaratilgan. Markaz yagona ma’rifiy makonda mamlakatning qadimiy tarixi, boy sivilizatsion merosi va o‘zbek xalqining yuksak madaniy hamda ilmiy salohiyatini namoyon etishga xizmat qiladi.

Majmuada alohida o‘rinni Markazning asosiy ma’naviy maskani hisoblangan Qur’oni karim zali egallaydi. Bu yerda dunyodagi eng qadimiy Qur’on nusxalaridan biri bo‘lgan Usmon mushafi saqlanmoqda.

Shuningdek, Islom sivilizatsiyasi markazida qator xalqaro tashkilotlar vakolatxonalari faoliyati uchun sharoitlar yaratilgan. Jumladan, ISESCO, IRCICA, Oksford islom tadqiqotlari markazi, Temuriylar davri tarixi va san’atini o‘rganish assotsiatsiyasi hamda TURKSOY kabi tuzilmalar shular jumlasidandir.