Yangiliklar

O‘zbekistondagi Islom sivilizatsiyasi markazi direktori Firdavs Abduxoliqov Turkiy madaniyat xalqaro tashkiloti (TURKSOY) rahbariyati bilan uchrashuv o‘tkazdi.

Muloqot chog‘ida turkiy tilli davlatlar o‘rtasidagi madaniy-gumanitar hamkorlikni yangi bosqichga olib chiqish, ilm-fan va ta’lim sohalarida qo‘shma tashabbuslarni ilgari surish hamda amaliy aloqalarni mustahkamlash masalalari atroflicha muhokama qilindi. Tomonlar madaniy merosni asrash va targ‘ib qilish turkiy dunyo mamlakatlari o‘rtasidagi hamjihatlik va o‘zaro ishonchni mustahkamlashda muhim poydevor ekanini alohida ta’kidladilar.

Uchrashuv davomida O‘zbekiston Respublikasi Prezidenti Shavkat Mirziyoyev rahbarligida amalga oshirilayotgan islohotlar va xalqaro tashabbuslar turkiy dunyodagi integratsiya jarayonlariga yangi sur’at bag‘ishlayotgani yuqori baholandi. Shu nuqtai nazardan, Toshkentda barpo etilgan O‘zbekistondagi Islom sivilizatsiyasi markazi nafaqat milliy, balki umumturkiy va umuminsoniy merosni o‘rganish hamda keng jamoatchilikka yetkazishga xizmat qilayotgan yirik ilmiy-ma’rifiy maskan sifatida e’tirof etildi.

Shuningdek, joriy yilda amalga oshirilishi rejalashtirilgan qator qo‘shma tadbirlar rejasi ham muhokama qilindi. Jumladan, 2026-yilda ilk bor O‘zbekistonda Turkiy tilli davlatlar yoshlari forumini o‘tkazish bo‘yicha erishilgan kelishuvga alohida e’tibor qaratildi. An’anaviy tarzda har yili TURKSOYga a’zo mamlakatlarning birida tashkil etiladigan ushbu nufuzli anjuman o‘tgan yillarda Qirg‘iziston va Qozog‘istonda muvaffaqiyatli o‘tkazilgan edi. Joriy yilning oktyabr oyida O‘zbekiston mezbonlik qiladigan mazkur forumda iqtisodiyot, madaniyat, ta’lim va sport sohalarida yuqori natijalarga erishgan 300 nafarga yaqin iqtidorli yoshlar ishtirok etishi kutilmoqda.

Sayid Yusuf, TURKSOY bosh kotibi o‘rinbosari:

— O‘zbekiston va boshqa turkiy mamlakatlar o‘rtasidagi aloqalarning kun sayin mustahkamlanib borayotgani, eng avvalo, Prezident Shavkat Mirziyoevning oqilona va uzoqni ko‘zlagan siyosati natijasidir. O‘zbekistondagi Islom sivilizatsiyasi markazining barpo etilishi barcha turkiy xalqlar uchun haqiqiy g‘urur manbai bo‘lib xizmat qiladi. TURKSOY va Markaz o‘rtasidagi qo‘shma loyihalarning kengayib borayotgani bizni alohida quvontiradi.

Muzokaralar yakunida tomonlar kelgusidagi hamkorlik istiqbollariga yuqori baho berib, ilmiy va madaniy aloqalarni yanada kengaytirishga tayyor ekanliklarini bildirdilar. Ushbu hamkorlik turkiy davlatlar o‘rtasidagi do‘stlik va birdamlikni mustahkamlash, umumiy tarixiy merosni asrab-avaylash va kelajak avlodlarga bezavol yetkazishda muhim ahamiyat kasb etadi.