Konferensiya ishtirokchilari tomonidan Amir Temur xotirasiga ehtirom ko‘rsatildi
Toshkent shahrida o‘tkazilayotgan “Amir Temur va temuriylar tamaddunining jahon tarixi va madaniyatidagi o‘rni va ahamiyati” mavzusidagi xalqaro konferensiya doirasida ishtirokchilar Amir Temur haykali poyiga gulchambar qo‘yish marosimida ishtirok etib, ulug‘ sohibqiron xotirasiga chuqur ehtirom bildirdilar.
Marosimdan so‘ng mehmonlar qayta ta’mirlanib, yangilangan ekspozitsiyalar bilan boyitilgan Temuriylar tarixi davlat muzeyiga tashrif buyurdilar. Ular muzey bo‘ylab sayohat davomida Temuriylar davriga oid noyob tarixiy manbalar, qo‘lyozmalar, harbiy anjomlar, miniatyuralar hamda turli arxeologik topilmalar bilan yaqindan tanishdilar.
Ishtirokchilar aytishicha, muzeydagi har bir eksponat o‘sha davrning nafaqat siyosiy va harbiy qudratini, balki ilmiy va madaniy yuksalishini ham yaqqol aks ettiradi. Ayniqsa, davlat boshqaruvi, shaharsozlik an’analari va madaniy merosga oid namunalar katta qiziqish uyg‘otgan.
Shuningdek, mehmonlar muzeydagi interaktiv va vizual ko‘rgazmalar orqali Amir Temur shaxsi va uning tarixdagi o‘rni haqida yanada keng tasavvurga ega bo‘lganlarini ta’kidladilar.
Temur shaxsini faqat harbiy sarkarda sifatida ko‘rish to‘g‘ri emas. Uning ulug‘ligi shundaki, u aql-zakovat va kuchni uyg‘unlashtirgan holda davlat boshqargan. Ko‘p holatlarda shaharlar qarshilik ko‘rsatmagan, balki uning siyosiy nufuzi va oqilona strategiyasiga qoyil qolishgan. Shu ma’noda “Kuch — adolatdadur” degan g‘oya uning butun faoliyatining asosiy tamoyili bo‘lib xizmat qilgan, - dedi Afg‘oniston Fanlar akademiyasi a’zosi Azizullo Arol.
Turkiyalik tarixchi va yozuvchi Abduraxmon Kaplan esa muzey haqidagi taassurotlarini shunday bayon etdi:
“Bugungi tashrif menda juda katta va chuqur taassurot qoldirdi. Temuriylar tarixi davlat muzeyi ekspozitsiyalari mazmunan boy, ilmiy jihatdan puxta ishlangan va juda yaxshi saqlangan. Ayniqsa, miniatyuralar, qo‘lyozmalar va shaxmatga oid eksponatlar Temurning davlat boshqaruvi va strategik tafakkurini yaqqol namoyon etadi. Bu muzey nafaqat O‘zbekiston, balki butun turkiy dunyo uchun ham katta ma’naviy boylikdir”.
