Sonic Chair: Markaz kutubxonasida innovatsion audio muhitini shakllantiruvchi ilg‘or texnologiya
Bugungi kunda kutubxonalar an’anaviy kitob mutolaasi makonidan tashqari, zamonaviy raqamli texnologiyalar orqali bilim olish imkoniyatlarini kengaytiruvchi innovatsion markazlarga aylanmoqda. Ayniqsa, multimedia texnologiyalari axborotni qabul qilish va o‘zlashtirish jarayonini yanada samarali va interaktiv tarzda tashkil etishga xizmat qilmoqda.
Prezident Shavkat Mirziyoyev tashabbusi bilan barpo etilgan O‘zbekistondagi Islom sivilizatsiyasi markazi bugun ana shunday ilg‘or ma’rifiy maskan sifatida faoliyat yuritmoqda. Markaz o‘z eshiklarini ochgan ilk kunlardanoq keng jamoatchilik e’tiborini tortdi — har kuni minglab, hatto millionlab tashrif buyuruvchilar bu yerga kelib, ushbu ulkan majmuada yaratilgan shart-sharoitlardan hayratga tushib, o‘z munosabatlarini bildirmoqda.
Tashrif buyuruvchilar, ayniqsa, muhtaram Prezidentimiz tashabbusi va mohir, qo‘li gul me’morlar mehnati samarasida yaratilgan bu noyob maskanni yuksak baholab, uni yangi O‘zbekistonning ma’naviy yuksalish timsoli sifatida e’tirof etmoqda.
Markaz kutubxonasida ham foydalanuvchilar uchun zamonaviy axborot muhitini shakllantirishga alohida e’tibor qaratilgan. Xususan, Yevropa sifatiga ega bo‘lgan Sonic Chair texnologiyasining joriy etilishi bu borada muhim qadam bo‘ldi.
Mutaxassislarning ta’kidlashicha, Sonic Chair — bu audio axborotni maxsus individual muhitda tinglash imkonini beruvchi innovatsion mulьtimedia o‘rindig‘i hisoblanadi. Uning asosiy xususiyati — o‘rindiqqa o‘rnatilgan akustik tizim orqali ovoz faqat foydalanuvchi atrofida tarqaladi va tashqi muhitga deyarli chiqmaydi.
Bu esa kutubxonadagi umumiy sukut va qulaylikni saqlagan holda, audiokitoblar, ilmiy ma’ruzalar, multimediaviy kontent va turli raqamli resurslardan foydalanish imkonini yaratadi.
Ma’lum qilinishicha, Markaz kutubxonasiga jami to‘rtta Sonic Chair o‘rnatilgan bo‘lib, ularning ayrimlari kompyuter tizimlari bilan, boshqalari esa planshet qurilmalari bilan integratsiya qilingan. Bu esa foydalanuvchilarga axborotni turli formatlarda mustaqil va qulay tarzda o‘zlashtirish imkoniyatini taqdim etadi.
Mutaxassislar fikricha, bunday innovatsion yechimlar kutubxona faoliyatini yangi bosqichga olib chiqadi. Chunki zamonaviy kutubxonalar endilikda faqat kitob saqlanadigan joy emas, balki turli formatdagi bilim va axborot manbalari jamlangan intellektual markazga aylanmoqda.
Shu jihatdan, O‘zbekistondagi Islom sivilizatsiyasi markazi kutubxonasida Sonic Chair texnologiyasining joriy etilishi nafaqat axborot xizmatlarini boyitadi, balki foydalanuvchilar uchun mutlaqo yangi — qulay, individual va innovatsion bilim olish muhitini yaratadi.
Ma’lumot uchun, O‘zbekistondagi Islom sivilizatsiyasi markazi qisqa vaqt ichida nafaqat mamlakatimizda, balki xalqaro miqyosda ham katta qiziqish uyg‘otdi. Har kuni o‘rtacha 5 mingdan ortiq tashrif buyuruvchilarning kelayotgani uning yuksak nufuzi va jozibasini yaqqol namoyon etmoqda. Shuningdek, majmua tarkibidagi boy fondga ega kutubxona ham yaqin kunlarda kitobxonlar uchun o‘z eshiklarini ochishi kutilmoqda.
Go‘zal Beknazarova
P/S:Maqolani markaz rasmiy saytiga havola bilan ko‘chirib e’lon qilish mumkin