Seyshel vaziri: “Butun dunyoga taqdim etilgan ulkan sovg‘a”
O‘zbekistondagi Islom sivilizatsiyasi markaziga tashrif buyurgan Seyshel Respublikasi tashqi ishlar va diaspora vaziri Barri For 3000 yillik tarixni qamrab olgan ekspozitsiyalar bilan tanishar ekan, bu yerda taqdim etilgan madaniy va ilmiy merosning zamonaviy texnologiyalar orqali jonli tarzda yoritilishiga yuqori baho berdi.
Seyshel vaziri o‘z taassurotlarida Markazni yuksak e’tirofga munosib loyiha sifatida baholab, uning barpo etilishida O‘zbekiston Respublikasi Prezidenti Shavkat Mirziyoyevning strategik qarashlari muhim ahamiyat kasb etganini ta’kidladi.
“Bu markaz — uzoqni ko‘ra olganlik natijasi. Bu yerda bir kun emas, balki bir necha kun qolib, sivilizatsiyani yanada chuqurroq o‘rganish istagi paydo bo‘ldi,” — dedi u.
Martabali mehmonning aytishicha, Markazda namoyish etilgan har bir eksponat alohida e’tiborga loyiq. Ayniqsa, taxminan 3000 yil avval yaratilgan bug‘u haykali unda katta hayrat uyg‘otgan.
“Qadim zamonda bunday san’at asarining yaratilgani meni hayratga soldi. Uni saqlab qolganingiz — bu katta yutuq,” — deya qo‘shimcha qildi vazir.
Tashrif yakunida u Faxriy mehmonlar kitobiga o‘z fikrlarini yozib qoldirdi. Unda Markaz “O‘zbekiston xalqiga va butun dunyoga taqdim etilgan ulkan sovg‘a” ekanini alohida ta’kidladi.
