Yangiliklar

Malayziya texnologiya universiteti professori Muhammad Shafriy Muhammad Rahim boshchiligidagi delegatsiya Islom sivilizatsiyasi markaziga tashrif buyurib, bu yerda yaratilgan ilmiy-ma’rifiy muhit va zamonaviy ekspozitsiyalar bilan tanishdi. Tashrif davomida mehmonlar Markazda islom tamadduni tarixi aniq, tushunarli va izchil tarzda taqdim etilganini alohida ta’kidladi. Ayniqsa, Markaziy Osiyoda sivilizatsiyaning shakllanishi va rivojlanishiga oid ma’lumotlarning boyligi hamda ularning mantiqiy tizimda yoritilgani katta taassurot qoldirdi.

Muhammad Shafriy Muhammad Rahim, Malayziya texnologiya universiteti professori:

—  Bu mening Markazga ilk tashrifim. Bu yerda ma’lumotlar juda aniq, tushunarli va yuqori darajada taqdim etilgan. Hikoya qilish uslubi orqali Markaziy Osiyoda islom tamaddunining rivojlanishi izchil ochib berilgan va bu tashrifni oddiy tomoshadan ko‘ra chuqur bilim olish jarayoniga aylantiradi. Shu bilan birga, Markazda jamlangan materiallar hajmi va ularning tizimli taqdim etilishi uni xalqaro darajadagi muhim ilmiy manba sifatida baholash imkonini beradi. Ayniqsa, zamonaviy texnologiyalardan foydalanilgani ekspozitsiyalarni yanada ta’sirchan qiladi va ma’lumotlarni keng jamoatchilikka tushunarli tarzda yetkazishga xizmat qiladi. Ushbu maskanni xalqaro ilmiy platforma sifatida baholash mumkin. Chunki bu yerda tamaddun taraqqiyotiga oid juda ko‘p va qimmatli ma’lumotlar jamlangan. Bu kabi yondashuv bugungi va kelajak avlod uchun ham katta ahamiyatga ega. 

Shuningdek, Markazning Ginnessning rekordlar kitobiga kiritilganligi munosib e’tirof deb o‘ylayman. Chunki Markazda tarixning mazmuni va taqdim etilish uslubi, ayniqsa zamonaviy texnologiyalardan foydalanilishi uni boshqa muzeylardan ajratib turadi. Bu yerda yaratilgan imkoniyatlar insonga nafaqat ma’lumot beradi, balki uni chuqurroq anglashga yordam beradi.