Yangiliklar

O‘zbekistondagi Islom sivilizatsiyasi markaziga tashrif insonni oddiy kuzatuvchidan o‘tmish va bugun o‘rtasidagi uzviy bog‘liqlikni his etuvchi mushohadichiga aylantiradi. Bu yerda vaqt tushunchasi an’anaviy mazmunini yo‘qotib, sivilizatsiyalar izchilligi orqali yangi ma’no kasb etadi.

Mazkur taassurot Malayziyaning Oliy ta’lim vaziri doktor Datuk Seri Diradja Zambri Abdul Qodirning Markaz ekspozitsiyalari bilan tanishuvi davomida yana bir bor o‘z tasdig‘ini topdi.

Datuk Seri Diradja Zambri Abdul Qodir, Malayziyaning Oliy ta’lim vaziri:

– Avvalo ta’kidlashni istardimki, bu Markaz — O‘zbekiston hukumati tomonidan amalga oshirilgan ulkan va uzoqni ko‘zlagan tashabbusdir. Bu yerda yaratilgan muhit va taqdim etilgan boyliklar har qanday tashrif buyuruvchida chuqur taassurot qoldiradi. Men ko‘rganlarimdan chin ma’noda hayratdaman.

Eng muhim jihatlardan biri — islom sivilizatsiyasining ushbu hududdagi tarixi izchil va ta’sirchan tarzda yoritilganidir. Bu nafaqat o‘tmishni anglash, balki uni kelajak avlodga yetkazish nuqtai nazaridan ham beqiyos ahamiyatga ega.

Bu markazning ta’limiy qiymati ayniqsa yuksak. Chunki sivilizatsiyani o‘rganish orqali inson xalqlar va davlatlarning asrlar davomida qanday rivojlanganini anglaydi. Bu yerda esa Markaziy Osiyo, xususan O‘zbekiston zaminidan yetishib chiqqan buyuk allomalar va olimlar merosi yorqin namoyon etilgan.

Men O‘zbekiston rahbariyatini shunday yuksak darajadagi Islom sivilizatsiyasi muzeyini barpo etgani munosabati bilan samimiy tabriklayman. Bu tashrif menda unutilmas taassurot qoldirdi.

Ma’lumot uchun: Joriy yilning 5 may kuni O‘zbekistondagi Islom sivilizatsiyasi markazida Malayziya Qirolichasi ishtirokida “Islom sivilizatsiyasida ilmiy an’ana: manbalar, dolzarb masalalar va salohiyat» mavzusida xalqaro ilmiy-amaliy konferensiya o‘tkazildi.