Yangiliklar

Joriy yil 5-may kuni O‘zbekistondagi Islom sivilizatsiyasi markazida “Islom sivilizatsiyasida ilmiy an’ana: manbalar, imkoniyatlar va dolzarb masalalar” mavzusida xalqaro ilmiy-amaliy konferensiya bo‘lib o‘tdi.

Ushbu anjuman islom ilmiy merosini o‘rganish, uning zamonaviy ilm-fan bilan bog‘liqligini tahlil qilish hamda xalqaro ilmiy hamkorlikni kengaytirishga qaratilgani bilan alohida ahamiyat kasb etdi.

O‘zbekistondagi Islom sivilizatsiyasi markazi bosh ilmiy xodimi Zohidulla Munavvarov Janubiy-Sharqiy Osiyo mamlakatlari, xususan Malayziyada islomiy va ilmiy an’analar shakllanishi tarixiy jihatdan bevosita Markaziy Osiyo, jumladan O‘zbekiston hududi bilan bog‘liqligini ta’kidladi.

“Janubiy-Sharqiy Osiyo mamlakatlari, jumladan Malayziyada islomiy va ilmiy an’analar shakllanishi bizning yurtimiz bilan bevosita bog‘liq. Tarixiy migratsiya va ko‘chish jarayonlari natijasida Islom dini ilk davrlardanoq ushbu hududlarga kirib borgan bo‘lib, shu jarayon orqali ilmiy-ma’rifiy an’analar ham u yerlarga yetib borgan.

Bugungi kunda Malayziyada O‘zbekiston va uning ilmiy-madaniy merosiga qiziqish juda yuqori. Ayniqsa, so‘nggi yillarda mamlakatimizda ilmiy va madaniy hayotda amalga oshirilayotgan keng ko‘lamli islohotlar, “Yangi O‘zbekiston” fenomeni doirasida ilm-fan va ma’rifatga berilayotgan e’tibor hamda Prezidentimiz tomonidan olib borilayotgan tizimli sa’y-harakatlar ularda katta qiziqish uyg‘otmoqda.

O‘ylaymanki, ushbu konferensiyaning ta’siri nafaqat ikki mamlakat doirasida, balki butun musulmon olami miqyosida ham keng aks-sado beradi.”