Yangiliklar

O‘zbekistondagi Islom sivilizatsiyasi markaziga Malayziya delegatsiyasining tashrifi davom etmoqda. Tashrif doirasida mehmonlar markazning barcha ekspozitsiya zallari bilan tanishib, nodir qo‘lyozmalar, tarixiy artefaktlar va zamonaviy interaktiv texnologiyalar bilan yaqindan tanishdilar.

Malayziya texnologiya universiteti Raja Zarith Sofiah Centre for Advanced Studies on Islam, Science and Civilization direktori Doktor Mohd Hilmi Ramli markaz faoliyatiga yuqori baho berdi.

— “O‘zbekistondagi ushbu markaz juda muhtasham va ilmiy jihatdan boy maskan ekan. Bu yerda Islom sivilizatsiyasi merosi nafaqat saqlanmoqda, balki zamonaviy texnologiyalar orqali keng targ‘ib etilmoqda. Muzey ekspozitsiyalari orqali tarixni nafaqat ko‘ramiz, balki uni his qilamiz,” — dedi Doktor Mohd Hilmi Ramli.

Markaz bilan tanishuv jarayonida mehmonlar Islomgacha bo‘lgan davr, Birinchi va Ikkinchi Renessans davri, shuningdek, buyuk allomalar merosiga bag‘ishlangan ekspozitsiyalarni ko‘zdan kechirdilar.

Malayziyaning Perlis shtati muftiysi Doktor Mohd Asri bin Zaynul Obidin ham markaz haqida o‘z fikrini bildirdi.

— “Imom Buxoriy, Imom Termiziy va Moturidiy kabi ulug‘ allomalarning merosini bu yerda ko‘rish menda katta taassurot qoldirdi. Bu markaz yosh avlod uchun haqiqiy ilhom manbai hisoblanadi,” — dedi u.

Ma’lumot o‘rnida, joriy yilning 5 may kuni Islom sivilizatsiyasi markazida Malayziya bilan hamkorlikda “Islom sivilizatsiyasida ilmiy an’ana: manbalar, imkoniyatlar va dolzarb masalalar” mavzusida xalqaro konferensiya bo‘lib o‘tgan edi. Anjumanda Malayziya, O‘zbekiston va Turkiyadan 300 ga yaqin olimlar ishtirok etib, Islom sivilizatsiyasi merosini o‘rganish va targ‘ib qilishning zamonaviy yo‘nalishlari muhokama qilindi.