Yangiliklar

Yevropada xavfsizlik va hamkorlik tashkiloti Bosh kotibi Feridun Sinirlio‘g‘li O‘zbekiston Prezidenti Shavkat Mirziyoyevning mualliflik loyihasi bo‘lgan Islom sivilizatsiyasi markaziga tashrifdan olgan taassurotlari uzoq vaqt xotirasida saqlanishini ma’lum qildi.

Yevropada xavfsizlik va hamkorlik tashkiloti Bosh kotibi Feridun Sinirlio‘g‘li boshchiligidagi delegatsiya O‘zbekistonga tashrifi doirasida O‘zbekistondagi Islom sivilizatsiyasi markazi bilan yaqindan tanishdi.

Tashrif davomida mehmonlarga O‘zbekiston Respublikasi Prezidenti Shavkat Mirziyoyev tashabbusi bilan barpo etilgan Markazning asosiy g‘oyasi, me’moriy yechimi, ekspozitsiyalari va ilmiy-ma’rifiy ahamiyati haqida ma’lumot berildi.

Delegatsiya a’zolari dastlab Markazning asosiy foyesida joylashgan “Buyuk siymolar galereyasi” hamda muhtasham ravoqlarni ko‘zdan kechirdi. O‘zbekiston tarixi, davlatchilik an’analari va sivilizatsion taraqqiyotini badiiy yondashuv hamda zamonaviy texnologiyalar uyg‘unligida aks ettirgan ekspozitsiyalar mehmonlarda katta qiziqish uyg‘otdi.

Shuningdek, YXHT delegatsiyasi Markazdagi xalqaro anjumanlar, ilmiy muloqotlar va nufuzli tadbirlar uchun mo‘ljallangan konferensiya zali bilan ham tanishdi. Zalning arxitekturasi, texnik imkoniyatlari va umumiy muhiti mehmonlarda alohida taassurot qoldirdi.

YeXHT Bosh kotibi Feridun Sinirlio‘g‘li Markazda yaratilgan muhit, ekspozitsiyalarning mazmunan boyligi va tarixiy merosni zamonaviy shaklda namoyon etish uslubini yuqori baholadi.

“Bu haqiqatan ham juda ta’sirli maskan. Prezident Shavkat Mirziyoyevga ushbu beqiyos tashabbus uchun samimiy minnatdorlik bildiraman. Bugungi tashrifdan olgan taassurotlarim qalbimda uzoq vaqt saqlanib qoladi. Bu yerda insoniyatning umumiy sivilizatsiyasi va boy madaniy merosi haqida juda ko‘p yangi ma’lumotlarga ega bo‘ldim. Ekspozitsiyadagi barcha bo‘limlar nihoyatda go‘zal va mazmunli tashkil etilgan. Har biri menda katta va unutilmas taassurot qoldirdi”, — dedi Feridun Sinirlio‘g‘li.