Yangiliklar

Belarus Respublikasi Bosh vaziri o‘rinbosari Yuriy Shuleyko rahbarligidagi delegatsiya O‘zbekistonga tashrifi doirasida Islom sivilizatsiyasi markazi bilan yaqindan tanishdi.

Mehmonlar Markazda yaratilgan muhit mamlakat tarixi va sivilizatsiyasini anglatuvchi keng qamrovli ma’rifiy makon sifatida tashkil etilganini alohida ta’kidladi. Delegatsiya a’zolari fikricha, bu kabi majmualar yosh avlodning tarixiy xotirasi va davlatchilik tafakkurini shakllantirishda muhim ahamiyat kasb etadi.

Yuriy Shuleyko, Belarus Respublikasi Bosh vaziri o‘rinbosari:

– Ta’kidlashni istardimki, o‘z tarixini va o‘z davlatchiligini bilish bugungi jamiyatda davlatchilikning eng muhim asoslaridan biri hisoblanadi. Shu ma’noda, O‘zbekiston Prezidenti Shavkat Mirziyoyev rahnamoligida tashkil etilgan ushbu fundamental tarixiy maskan — muzey, ko‘rgazma majmuasi va bugungi O‘zbekiston tarixini anglatuvchi ma’rifiy markaz sifatida — aholiga, mamlakat fuqarolariga, ayniqsa yosh avlodga yurtingizning shakllanish tarixi, rivojlanish va bugungi zamonaviy qiyofaga ega bo‘lish bosqichlarini namoyon etishda g‘oyat muhim qadamdir. Bu, menimcha, nafaqat ramziy ma’noga ega, balki bugungi dunyo davlatlari uchun kelgusi taraqqiyot yo‘lida o‘ziga xos namuna hamdir. Bu yerda ushbu muzeyni barpo etgan davlatning o‘ziga xos uslubi va ruhi yaqqol seziladi.