Madaniy diplomatiyaning yangi nuqtasi: AQSh Davlat departamenti vakillari Islom sivilizatsiyasi markazi bilan tanishdi
O‘zbekistondagi Islom sivilizatsiyasi markaziga AQSh Davlat kotibining jamoatchilik diplomatiyasi bo‘yicha o‘rinbosari Sara Rodjers boshchiligidagi delegatsiya tashrif buyurdi.
Tashrif davomida mehmonlar Markazda amalga oshirilayotgan qurilish va ekspozitsiya ishlari, shuningdek, O‘zbekiston xalqining ko‘p asrlik tarixiy-madaniy merosini hamda islom sivilizatsiyasining jahon taraqqiyotiga qo‘shgan ulkan hissasini keng targ‘ib etishga qaratilgan loyihalar bilan yaqindan tanishdi.
Delegatsiya a’zolari Markaz ekspozitsiyalarida ajdodlarimizning ilm-fan, madaniyat, davlatchilik va ma’naviyat sohalaridagi boy merosi zamonaviy texnologiyalar asosida namoyish etilayotganini alohida qayd etdi. Ular ekspozitsiyalarning mazmunan boyligi, ilmiy asoslanganligi va zamonaviy mulьtimedia yechimlari bilan uyg‘unlashganini yuqori baholadi.
Tashrif davomida mehmonlarga Markazning asosiy konsepsiyasi, uning O‘zbekiston va jahon sivilizatsiyasi tarixini o‘rganish hamda keng jamoatchilikka yetkazishdagi ahamiyati haqida batafsil ma’lumot berildi.
Delegatsiya a’zolari Markaz faoliyati orqali O‘zbekistonning boy madaniy merosi, buyuk allomalarning ilmiy merosi va islom sivilizatsiyasi rivojiga qo‘shgan hissasi xalqaro maydonda keng targ‘ib etilayotganini yuqori baholadilar.
Tashrif yakunida mehmonlar mamlakatimizda tarixiy merosni asrash, tadqiq etish va uni kelajak avlodlarga yetkazish borasida amalga oshirilayotgan keng ko‘lamli ishlarga yuqori baho berib, O‘zbekistondagi Islom sivilizatsiyasi markazi faoliyatiga muvaffaqiyat tiladilar.