Yangiliklar

Bugungi globallashuv sharoitida sivilizatsiyalar o‘rtasidagi muloqot va o‘zaro anglashuv har qachongidan ham muhim ahamiyat kasb etmoqda. Ana shunday jarayonlarning amaliy ifodasi sifatida O‘zbekistondagi Islom sivilizatsiyasi markaziga tashrif buyurgan xitoylik olimlar va ekspertlar mazkur majmuani tarixiy merosni saqlash, ilm-fanni targ‘ib qilish va xalqlar o‘rtasidagi madaniy yaqinlashuvga xizmat qilayotgan muhim xalqaro maydon sifatida baholadilar. Mehmonlar Markazga tashrif chog‘ida nafaqat nodir eksponatlar va zamonaviy muzey texnologiyalari bilan tanishdilar, balki Markaz orqali Markaziy Osiyoning jahon ilm-fani va madaniyati taraqqiyotidagi o‘rnini yana bir bor kashf etdilar.

Delegatsiya tarkibidagi Pekin universiteti professori Dun Syan markazning mahobatli me’moriy qiyofasi va boy mazmunga ega ekspozitsiyalari islom madaniyatining insoniyat taraqqiyotiga qo‘shgan beqiyos hissasini yanada chuqur anglash imkonini berganini ta’kidladi.

Ayniqsa, jahon ilm-fani, madaniyati va sivilizatsiyasi rivojiga ulkan hissa qo‘shgan allomalar hayoti va ilmiy merosini qamrab olgan “Buyuk siymolar galereyasi” mehmonlarda katta qiziqish uyg‘otdi. Delegatsiya a’zolari mazkur galereya orqali Markazning “sivilizatsiyalar – shaxslar – kashfiyotlar” konsepsiyasi amaliy ifodasini topganini qayd etdilar.

Tashrif davomida mehmonlar Markazda islom sivilizatsiyasi tarixi, ilm-fan, madaniyat va ma’rifat sohalaridagi yutuqlarni zamonaviy raqamli va mulьtimedia texnologiyalari orqali namoyish etish bo‘yicha amalga oshirilayotgan ishlar bilan tanishdilar. Ular mazkur yondashuv tarixiy merosni asrab-avaylash bilan bir qatorda, uni xalqaro ilmiy hamjamiyat va keng jamoatchilikka zamonaviy formatda yetkazishda muhim ahamiyat kasb etishini ta’kidladilar.

Dun Syan Pekin universiteti professori o‘z fikrlarida shunday dedi:

– Islom sivilizatsiyasi markazini ko‘rib, nihoyatda katta taassurot oldik. Markazning mahobatli me’moriy qiyofasi va boy ekspozitsiyalari bizga islom madaniyatining buyukligi hamda uning jahon sivilizatsiyasi taraqqiyotiga qo‘shgan ulkan hissasini yana bir bor his qilish imkonini berdi.

Shu bilan birga, bu yerda biz bugungi O‘zbekistonning yangi taraqqiyot va uyg‘onish bosqichida ekanini ham yaqqol ko‘rdik. Mamlakatda tarixiy merosni asrash va uni zamonaviy yondashuvlar asosida namoyon etish borasida amalga oshirilayotgan ishlar tahsinga loyiq.

Xitoy va O‘zbekiston o‘rtasidagi do‘stlik va hamkorlik munosabatlari kelgusida ham mustahkamlanib borishiga, ikki mamlakat xalqlari umumiy taraqqiyot va insoniyatning mushtarak kelajagi yo‘lida birgalikda munosib hissa qo‘shishiga ishonamiz.

Tashrif yakunida delegatsiya vakillari O‘zbekistondagi Islom sivilizatsiyasi markazi milliy va umuminsoniy merosni o‘rganish, targ‘ib qilish hamda turli madaniyatlar va xalqlar o‘rtasidagi muloqotni mustahkamlashga xizmat qilayotgan muhim xalqaro gumanitar maydonlardan biri ekanini alohida ta’kidladilar.

Mazkur tashrif O‘zbekiston va Xitoy o‘rtasidagi ilmiy-ma’rifiy hamkorlikni yanada kengaytirish, madaniy merosni o‘rganish va sivilizatsiyalar o‘rtasidagi muloqotni rivojlantirishga qaratilgan sa’y-harakatlarning amaliy ifodasi bo‘ldi.