Yangiliklar

Islom sivilizatsiyasi tarixi — bu faqat o‘tmish haqidagi xotira emas, balki xalqlar o‘rtasidagi ma’rifiy muloqot, o‘zaro anglashuv va bugungi hamkorlik uchun mustahkam asosdir. Bugungi dunyoda iqtisodiy hamkorlik barqaror bo‘lishi uchun xalqlar o‘rtasidagi madaniy va ma’naviy muloqot ham mustahkam bo‘lishi talab etiladi. Toshkent xalqaro investitsiya forumi doirasida O‘zbekistondagi Islom sivilizatsiyasi markaziga tashrif buyurgan O‘mon Sultonligi delegatsiyasi mazkur majmuani nafaqat boy tarixiy merosni saqlovchi maskan, balki sivilizatsiyalar o‘rtasidagi o‘zaro anglashuv va gumanitar hamkorlikni mustahkamlovchi xalqaro platforma sifatida baholadi.

Toshkent shahrida bo‘lib o‘tayotgan beshinchi Toshkent xalqaro investitsiya forumi doirasida O‘mon Sultonligining “Sohar International Bank SAOG” kompaniyasi ijrochi vitse-prezidenti Al-Mutasim Al Mutairi boshchiligidagi delegatsiya O‘zbekiston Prezidenti Shavkat Mirziyoyevning tashabbusi mahsuli bo‘lgan Islom sivilizatsiyasi markaziga tashrif buyurdi.

Mehmonlar Markaz ekspozitsiyalari bilan tanishar ekan, ayniqsa Birinchi Renessans davri merosi, islom dinining keng hududlarga tarqalishi hamda ushbu jarayonning ilm-fan va ma’rifat rivojiga ko‘rsatgan ta’siriga alohida qiziqish bildirdi.

Tashrif davomida delegatsiyaga noyob qo‘lyozmalar, tarixiy ashyolar va ilmiy meros namunalari orqali Markaziy Osiyo zaminining islom sivilizatsiyasi taraqqiyotiga qo‘shgan hissasi haqida atroflicha ma’lumot berildi.

Xususan, yurtimizdan yetishib chiqqan buyuk mutafakkirlar faoliyati, ularning diniy va dunyoviy ilmlarni uyg‘un rivojlantirishdagi o‘rni mehmonlarda katta taassurot qoldirdi.

Tashrif yakunida O‘mon Sultonligidan Al-Mutasim bin Musabbah Al-Mutayriy Markaz haqidagi taassurotlari bilan o‘rtoqlashib, samimiy mehmondo‘stlik uchun minnatdorlik bildirdi. Uning ta’kidlashicha, Markaz islom sivilizatsiyasi, undan avvalgi qadimiy davrlar va bugungi Yangi O‘zbekiston taraqqiyotini o‘zaro bog‘liq holda namoyon etadi.

– Bu juda buyuk markaz va yirik islomiy muzeylardan biri. Men arab dunyosi va barcha mehmonlarga ushbu muzeyga tashrif buyurishni tavsiya qilaman, zero bu yerdagi noyob eksponatlar har bir kishida katta taassurot qoldiradi, — dedi u.

Ushbu tashrif O‘zbekistonning boy ma’naviy-ma’rifiy merosini xalqaro hamjamiyatga keng targ‘ib etish, shuningdek, madaniy-gumanitar muloqot va o‘zaro anglashuvni mustahkamlashda muhim ahamiyat kasb etdi.