Yangiliklar

Toshkentdagi V Xalqaro investitsiya forumi iqtisodiy hamkorlik maydoni sifatida xizmat qilayotgan bir paytda, uning doirasida Islom sivilizatsiyasi markaziga tashriflar mamlakatlar o‘rtasidagi munosabatlarning yanada keng qamrovli ekanini namoyon etmoqda. Iqtisodiy muloqot doirasida yurtimizda jamlangan xorijiy mehmonlar O‘zbekiston Prezidenti Shavkat Mirziyoyevning tashabbusi bilan jaholatga qarshi ma’rifat namunasi sifatida Toshkentda barpo etilgan Islom sivilizatsiyasi markaziga tashrif buyurib, madaniy merosimizni hayrat bilan kashf etishmoqda.

Toshkent shahrida o‘tayotgan V xalqaro investitsiya forumi doirasida Xitoy Xalq Respublikasi Milliy energetika ma’muriyati rahbari Van Xunchji boshchiligidagi delegatsiya O‘zbekiston Prezidenti tashabbusi bilan barpo etilib, xalqaro maydonda keng e’tirof etilayotgan Islom sivilizatsiyasi markaziga tashrif buyurdi.

Tashrif davomida mehmonlar Markaz ekspozitsiyalari orqali O‘zbekiston zaminidan yetishib chiqqan buyuk mutafakkirlar va allomalarning jahon ilm-fani taraqqiyotiga qo‘shgan ulkan hissasi, islom sivilizatsiyasining insoniyat taraqqiyotidagi o‘rni hamda noyob qo‘lyozma merosi bilan yaqindan tanishdilar.

Ayniqsa, muqaddas Qur’on qo‘lyozmalari, ilmiy merosga bag‘ishlangan ekspozitsiyalar hamda tarixiy voqeliklarni zamonaviy multimedia texnologiyalari yordamida namoyish etish uslubi delegatsiya a’zolarida katta qiziqish uyg‘otdi.

Mehmonlar Markaz ekspozitsiyalari orqali O‘zbekiston hududi azaldan ilm-fan, ma’rifat va sivilizatsiyalar muloqoti markazlaridan biri bo‘lib kelganini alohida e’tirof etdilar.

Tashrif yakunida delegatsiya a’zolari Markazda tarixiy merosni saqlash, tadqiq etish va zamonaviy texnologiyalar orqali keng jamoatchilikka yetkazish bo‘yicha amalga oshirilayotgan ishlarga yuqori baho berdilar.