Yangiliklar

V Toshkent xalqaro investitsiya forumi doirasida mamlakatimizga tashrif buyurgan Indoneziya delegatsiyasi Islom sivilizatsiyasi markaziga O‘zbekistonning boy tarixi, ilm-fan va ma’rifat an’analari, savdo yo‘llari orqali shakllangan madaniy aloqalar hamda islom sivilizatsiyasi taraqqiyotidagi o‘rni bilan yaqindan tanishdi. 

Dyax Roro Esti Vidya Putri, Indoneziya Respublikasi Savdo vaziri o‘rinbosari: 

– Bu mening O‘zbekistonga va Markazga ilk tashrifim. Birinchi taassurotim juda kuchli bo‘ldi. Markaz ta’sirchan, keng qamrovli va interaktiv tarzda tashkil etilgan. Bu yerda islom sivilizatsiyasining shakllanishi, savdo yo‘llari orqali yuzaga kelgan aloqalar va O‘zbekistonning kelajak taraqqiyoti haqida ko‘p ma’lumot oldik. Menimcha, bu Markaz tarixni odamlarga yaqinlashtiradi. U tarixni faqat ma’lumot sifatida emas, balki qiziqarli va zavqli tajriba sifatida taqdim etadi, — dedi Indoneziya Respublikasi Savdo vaziri o‘rinbosari. 

Indoneziya va O‘zbekiston o‘rtasidagi bog‘liqlik faqat bugungi savdo-iqtisodiy hamkorlik bilan cheklanmaydi. Dunyoda musulmon aholisi eng ko‘p mamlakatlardan biri bo‘lgan Indoneziya uchun O‘zbekistonning islom sivilizatsiyasidagi o‘rni, ayniqsa, Imom Buxoriy merosi alohida ma’naviy ahamiyatga ega. Suhbat davomida Dyax Roro Esti Vidya Putri Indoneziyaning birinchi Prezidenti Sukarnoning Imom Buxoriy maqbarasi bilan bog‘liq tarixiy xotirasiga ham to‘xtalib, bu meros bugun ham Indoneziya jamoatchiligida O‘zbekistonga bo‘lgan qiziqishni kuchaytirib kelayotganini qayd etdi.