Germaniyalik ekspert Islom sivilizatsiyasi markazining ta’limiy konsepsiyasini e’tirof etdi
Germaniyaning Frankfurt Main Finance tashkiloti delegatsiya vakillari O‘zbekiston Prezidenti Shavkat Mirziyoyev tashabbusi bilan bunyod etilgan Islom sivilizatsiyasi markazida yurtimizning ko‘p asrlik tarixi, boy madaniy merosi va buyuk ajdodlarimiz ilmiy merosini aks ettiruvchi ekspozitsiyalarni ko‘zdan kechirdilar.
Ayniqsa, nodir qo‘lyozmalar, tarixiy hujjatlar va madaniy meros namunalarining raqamli formatda taqdim etilishi mehmonlarda katta qiziqish uyg‘otdi. Ekspozitsiyalar orqali Markazning nafaqat muzey, balki ilmiy tadqiqotlar, ta’lim va ma’rifatni uyg‘unlashtirgan zamonaviy platforma sifatida shakllanayotgani e’tirof etdilar.
Xubertus Vat, Frankfurt Main Finance tashkiloti direktori:
Menimcha, Islom sivilizatsiyasi markazi insonning ko‘zini ochadigan, dunyoqarashini kengaytiradigan maskandir. Markaz bu zaminlarda shakllangan sivilizatsiyaning naqadar chuqur, boy va keng qamrovli ekanini namoyon etadi. Menga ayniqsa muzeyning ta’limiy konsepsiyasi yoqdi. Ekspozitsiyaning taqdim etilish uslubi juda puxta o‘ylangan. Sayohat islomdan oldingi davrdan boshlanib, Birinchi Renessans, Ikkinchi Renessans bosqichlari orqali zamonaviy O‘zbekistongacha olib keladi. Mazkur konsepsiya muzeyning beqiyos go‘zalligi va zamonaviy taqdimoti bilan uyg‘unlashib, uni haqiqatan ham noyob maskanga aylantirgan.
