Bosh prokuraturaning 70 nafar faxriysi O‘zbekistondagi Islom sivilizatsiyasi markaziga tashrif buyurdi
O‘zbekiston Respublikasi Bosh prokuraturasining 70 nafar faxriysi O‘zbekistondagi Islom sivilizatsiyasi markaziga tashrif buyurib, xalqimiz sivilizatsiyasi, ilmiy merosi va ma’naviy qadriyatlarining ming yillik taraqqiyot yo‘li bilan yaqindan tanishdi. Ekspozitsiyalar, nodir qo‘lyozmalar, zamonaviy texnologiyalar va Yangi O‘zbekiston g‘oyalari uyg‘unlashgan muhit mehmonlarda chuqur taassurot qoldirdi.
O‘zbekiston Respublikasi Bosh prokuraturasining 70 nafar faxriysi O‘zbekistondagi Islom sivilizatsiyasi markaziga tashrif davomida Islomdan avvalgi sivilizatsiyalar tarixi, Birinchi va Ikkinchi Renessans davrlari, buyuk allomalar merosi hamda Yangi O‘zbekistonda amalga oshirilayotgan keng ko‘lamli islohotlar haqida batafsil ma’lumot berildi. Shuningdek, “Yangi O‘zbekiston — Yangi Renessans poydevori” va Qur’oni karim zali ekspozitsiyasi mehmonlarda alohida qiziqish uyg‘otdi.
Prokuratura faxriylari Markazda tarixiy merosning davrlar kesimida izchil va yaxlit tarzda namoyon etilganini yuqori baholadilar.
Bosh prokuratura faxriysi Dildora Safoyeva Markazda ajdodlar merosi va kelajak avlod uchun yaratilayotgan imkoniyatlar uyg‘unlashganini ta’kidladi. Uning fikricha, noyob kutubxona, ilmiy tadqiqotlar uchun yaratilgan muhit va boy ekspozitsiyalar har bir tashrif buyuruvchida milliy g‘urur tuyg‘usini uyg‘otadi.
Faxriylar uchun “Yangi O‘zbekiston — Yangi Renessans poydevori” ekspozitsiyasida joylashgan Bosh prokuratura faoliyatiga bag‘ishlangan maxsus burchak alohida ahamiyat kasb etdi. Ekspozitsiyada prokuratura tarixi, soha rivojiga hissa qo‘shgan faxriylar faoliyati hamda tarixiy hujjatlar namoyish etilgan.
Tashrif ishtirokchilaridan biri Mirzo Obidov Markaz bilan tanishuv tarix haqidagi tasavvurlarni yanada boyitishini qayd etdi.
Tarixni bilish — o‘zligingni anglash demak. Bu yerda jamlangan noyob qo‘lyozmalar, eksponatlar va ilmiy meros insonni o‘tmish bilan yuzma-yuz qo‘yadi. Bu markaz nafaqat milliy, balki xalqaro ahamiyatga ega bo‘lgan ma’naviy-ma’rifiy maskandir, — dedi u.
Faxriylar kengashi a’zosi Gulbahor Isroilova ham tashrif taassurotlari bilan o‘rtoqlashar ekan, Markazni butun bir sivilizatsiya ruhi mujassam bo‘lgan noyob ilm-ma’rifat maskani sifatida ta’rifladi.
Bu yerda inson tarix ichiga kirib qoladi. Ayniqsa, kutubxona va qo‘lyozmalar fondi menda katta taassurot qoldirdi. Bu yer yoshlarga o‘z tarixi bilan faxrlanishni va ajdodlar merosidan ilhom olishni o‘rgatadi, — dedi u.
Tashrif yakunida mehmonlar Markaz kutubxonasiga a’zo bo‘lib, kelgusida uning ilmiy-ma’rifiy imkoniyatlaridan muntazam foydalanish istagini bildirdilar.
Faxriylar ta’kidlaganidek, mazkur tashrif oddiy ekskursiya emas, balki o‘tmish va kelajakni bog‘lagan ma’naviy muloqotga aylandi. Ajdodlar merosini anglash, uni asrab-avaylash va kelajak avlodlarga yetkazish g‘oyasi ishtirokchilar qalbida yanada mustahkamlandi.