Yangiliklar

Buyuk Britaniyaning tashqi ishlar bo‘yicha sobiq parlament kotibi Rehman Chishti O‘zbekistondagi Islom sivilizatsiyasi markazini o‘tmishni anglash orqali kelajakka yo‘l ochadigan ilmiy bilimlar markazi sifatida baholadi.

“O‘zbekistondagi Islom sivilizatsiyasi markazida bo‘lish men uchun katta sharaf. Prezident Shavkat Mirziyoyevning bunday xalqaro bilim markazini yaratish borasidagi qarashi va uzoqni ko‘zlagan tashabbusiga yuksak ehtirom bildiraman. Kelajakka tayyorlanish uchun inson o‘z tarixi va merosini bilishi kerak.

Islom sivilizatsiyasi tibbiyot, matematika, astronomiya va boshqa ilm-fan sohalarida ulkan iz qoldirgan. Bugun kvant texnologiyalari, kiberxavfsizlik va sun’iy intellekt haqida gapirayotganimizda, ularning asosida ham bilim va matematika turganini unutmasligimiz zarur. Shu ma’noda, ushbu Markaz yoshlarga o‘tmishdagi buyuk ilmiy yutuqlardan ilhom olib, kelajak uchun yangi yechimlar yaratishga undaydi.

Markaz bo‘ylab yurar ekanman, o‘zim ham ko‘p narsa o‘rgandim. Ibn Sino merosi, islom olamining ilm-fan rivojiga qo‘shgan hissasi, shuningdek, O‘zbekistonning Buyuk ipak yo‘lidagi tarixiy o‘rni menda alohida taassurot qoldirdi. Bu Markaz nafaqat O‘zbekiston, balki butun dunyo uchun muhim bilim va ilhom manbaidir”, — dedi Rehman Chishti.

Tashrif doirasida Rehman Chishti O‘zbekistondagi Islom sivilizatsiyasi markazi direktorining ilmiy ishlar bo‘yicha o‘rinbosari Gulnora G‘aniyeva hamda Imom Moturidiy xalqaro ilmiy-tadqiqot markazi ilmiy kotibi Jasur Najmiddinov bilan muloqot o‘tkazdi.

Suhbat davomida Markazning ilmiy-ma’rifiy faoliyati, islom sivilizatsiyasi merosini xalqaro miqyosda targ‘ib etish, shuningdek, kelgusidagi hamkorlik imkoniyatlari yuzasidan fikr almashildi. Muloqotda Markazning xalqaro ilmiy markazlar bilan aloqalarni kengaytirishdagi o‘rni ham alohida qayd etildi. Shuningdek, islom ilm-fani, ma’rifat va bag‘rikenglik g‘oyalarini keng auditoriyaga yetkazishda ilmiy hamkorlik muhim ahamiyat kasb etishi ta’kidlandi.

Rehman Chishti Markazning islom ma’rifati, bag‘rikenglik, ilm va madaniy merosni birlashtiruvchi xalqaro platforma sifatidagi o‘rnini alohida ta’kidladi. Uning fikricha, bu kabi maskanlar islomning asl mohiyati — bilim, rahm-shafqat, ehtirom va ezgulikka asoslangan qadriyatlarini jahon jamoatchiligiga yetkazishda muhim ahamiyatga ega.

Tashrif yakunida mehmon Faxriy mehmonlar kitobiga dastxat qoldirdi. Markaz rahbariyati tomonidan Rehman Chishtiga buyuk allomalar hayoti va ilmiy faoliyati, Yangi O‘zbekiston taraqqiyoti hamda Uchinchi Renessans g‘oyalarini o‘zida mujassam etgan kitob esdalik sovg‘asi sifatida taqdim etildi.