Yangiliklar

Misrning nufuzli «Al-Jumhuriya» gazetasida O‘zbekistonda o‘tayotgan I Xalqaro Islom sivilizatsiyasi forumi haqida maxsus maqola e’lon qilindi. Unda Toshkent, Samarqand va Termiz shaharlarida tashkil etilayotgan mazkur anjuman tinchlik, bag‘rikenglik va ilm-ma’rifat g‘oyalarini ilgari surishga qaratilgan muhim xalqaro muloqot maydoni sifatida e’tirof etildi.

Nashrda forumda turli davlatlardan taniqli olimlar, mutafakkirlar va diniy ulamolar ishtirok etayotgani, Misrdan esa Madaniyat, Vaqf ishlari va Oliy ta’lim vazirlari, Respublika muftiysi, Al-Azhar rahbariyati hamda diniy ta’lim va fatvo sohasidagi yetakchi mutaxassislar qatnashishi alohida qayd etildi. O‘zbekistonning Misrdagi elchisi Mansurbek Qilichevning ta’kidlashicha, forum islom dunyosida intellektual, ilmiy va madaniy hamkorlikni yanada mustahkamlashga xizmat qiladi. Shuningdek, Al-Azhar va Misr Dorul Iftosi kabi nufuzli muassasalarning ishtiroki ekstremizmga qarshi ma’rifat asosida kurashish bo‘yicha xalqaro hamkorlikni yanada kuchaytirish uchun muhim ahamiyatga ega.

Maqolada forum doirasida islomiy merosni asrash, diniy ta’limni rivojlantirish, qo‘lyozmalarni muhofaza qilish va raqamlashtirish, imomlar hamda tadqiqotchilar tayyorlash bo‘yicha qo‘shma loyihalar muhokama qilinishi ta’kidlangan.

«Al-Jumhuriya» nashri forumni Markaziy Osiyodagi eng yirik ilmiy-ma’rifiy anjumanlardan biri sifatida baholab, u gumanitar hamkorlikni kengaytirish, sivilizatsiyalar o‘rtasidagi muloqotni mustahkamlash va islomning tinchlikparvarlik, ma’rifatparvarlik hamda bag‘rikenglik g‘oyalarini xalqaro maydonda keng targ‘ib etishga xizmat qilishini alohida qayd etdi.