Yangiliklar

I Xalqaro islom sivilizatsiyasi forumi doirasida tashkil etilgan «Imom Moturidiy merosi: mo‘’tadillik, bag‘rikenglik va ilm-ma’rifat poydevori» mavzusidagi xalqaro konferensiya doirasida xorijlik tadqiqotchilar o‘rtasida o‘tkazilgan «Moturidiylik ta’limoti – ilm, tafakkur va bag‘rikenglik qadriyatlari orqali sivilizatsiyalarni bog‘lovchi meros» mavzusidagi xalqaro ilmiy tanlov g‘oliblarini taqdirlash marosimi bo‘lib o‘tdi.

Mazkur tanlov O‘zbekiston Respublikasi Prezidentining 2025 yil 14-martdagi «Imom Moturidiy tavalludining 1155 yilligini keng nishonlash to‘g‘risida»gi qarori ijrosini ta’minlash maqsadida Imom Moturidiy xalqaro ilmiy-tadqiqot markazi tomonidan tashkil etildi.

Tanlovdan ko‘zlangan asosiy maqsad buyuk mutafakkir Imom Moturidiyning boy ilmiy-ma’rifiy merosini xalqaro miqyosda keng targ‘ib qilish, moturidiylik ta’limotini chuqur ilmiy asosda o‘rganish, xorijlik tadqiqotchilarning mazkur yo‘nalishdagi ilmiy izlanishlarini qo‘llab-quvvatlash hamda turli mamlakatlar olimlari o‘rtasida ilmiy muloqot va hamkorlikni yanada rivojlantirishdan iborat.

Tanlov doirasida Qozog‘iston, Qirg‘iziston, Yaman, Malayziya, Rossiya, Afg‘oniston va boshqa mamlakatlardan kelib tushgan ilmiy ishlar nufuzli hakamlar hay’ati tomonidan mavzuning dolzarbligi, ilmiy yangiligi, tadqiqotning nazariy va amaliy ahamiyati hamda mualliflarning ilmiy salohiyati kabi mezonlar asosida baholandi.

Yakuniy natijalarga ko‘ra:
1-o‘rin – Shohimardon O‘rinbekov (Qirg‘iziston);
2-o‘rin – Sayf ibn Ali al-Asriy (Yaman);
3-o‘rin – Shukran bin Abdurahmon (Malayziya).

G‘oliblarga diplomlar va qimmatbaho sovg‘alar tantanali ravishda topshirildi. Shuningdek, tanlov nizomiga muvofiq, ular uchun O‘zbekistonning qadimiy shaharlari – Samarqand, Buxoro va Toshkent bo‘ylab madaniy-ma’rifiy sayohat tashkil etiladi.

Mazkur xalqaro ilmiy tanlov I Xalqaro islom sivilizatsiyasi forumining muhim ilmiy-ma’rifiy tadbirlaridan biri sifatida Imom Moturidiy merosini xalqaro maydonda keng targ‘ib etish, uning mo‘’tadillik, bag‘rikenglik va ma’rifatparvarlik g‘oyalarini ilmiy jihatdan o‘rganish hamda jahon olimlari o‘rtasida o‘zaro hamkorlikni mustahkamlashga xizmat qildi.