Yangiliklar

O‘zbekistondagi Islom sivilizatsiyasi markazida gid-ekskursovodlar malakasini oshirishga bag‘ishlangan xalqaro seminar-trening tashkil etildi. Unda joriy yilning 7-11 iyul sanalarida Toshkent, Samarqand va Termiz shaharlarida o‘tkazilgan I Xalqaro Islom sivilizatsiyasi forumiga tashrif buyurgan Sankt-Peterburgning Rossiya etnografiya muzeyi mutaxassisi Tatyana Yemelyanenko hamda Rossiya Davlat din tarixi muzeyining «Islom» fondi saqlovchisi Irina Osmanova ishtirok etishdi. Xalqaro mutaxassislar muzey ekskursiyalarini tashkil etish, ekspozitsiyalarni ilmiy asosda talqin qilish, tashrif buyuruvchilar bilan samarali muloqot o‘rnatish va madaniy merosni xolis hamda mas’uliyat bilan yetkazish borasidagi ko‘p yillik tajribalari bilan o‘rtoqlashdilar.

Seminarda gid faqat ma’lumot beruvchi emas, balki turli xalqlar va madaniyatlar o‘rtasida o‘zaro anglashuvni mustahkamlaydigan muhim muloqot elchisi ekani alohida ta’kidlandi. Ayniqsa, tarixiy voqealarni talqin qilishda ilmiy xolislik, hassoslik va mas’uliyat tamoyillariga qat’iy amal qilish zarurligi qayd etildi. Zero, tarixning noto‘g‘ri talqini xalqlar o‘rtasida tushunmovchiliklarga sabab bo‘lishi mumkin bo‘lsa, uning haqqoniy va xolis yoritilishi o‘zaro hurmat, ishonch va yaqinlikni mustahkamlashga xizmat qiladi.

– Gid ekskursovodlar bilan muzey faoliyati va etnografik ekspozitsiyalarni talqin qilish tajribasi haqida suhbatlashdik. Biz muzeylarda eksponatlarni shunchaki namoyish etmaymiz. Har bir buyumning yaratilish tarixi, undagi naqshlar, ranglar va shakllar orqali xalqning dunyoqarashi, turmush tarzi va madaniy qadriyatlarini ochib berishga harakat qilamiz, — dedi Tatyana Yemelyanenko.

Seminar qizg‘in savol-javoblar, amaliy muhokamalar va o‘zaro tajriba almashinuvlari ruhida o‘tdi. Unda muzey ekskursiyalarini yanada takomillashtirish, turli toifadagi tashrif buyuruvchilar bilan ishlash usullarini takomillashtirish hamda zamonaviy muzey kommunikatsiyalarini rivojlantirish masalalari yuzasidan atroflicha fikr almashildi.