Yangiliklar

Yaqinda O‘zbekistondagi Islom sivilizatsiyasi markazida tashkil etilgan I Xalqaro Islom sivilizatsiyasi forumi doirasida «Islom nuri durdonalari» ko‘rgazmasi bo‘lib o‘tdi. Unda islom san’ati va madaniy merosining noyob namunalari keng jamoatchilikka namoyish etildi. Ko‘rgazmada katta qiziqish uyg‘otgan eksponatlardan biri XIX–XX asrlarga oid Usmoniylar davrida yaratilgan «Alloh» va «Muhammad» yozuvli kalligrafik pannolar bo‘ldi.

O‘lchami 202,2 × 205,5 santimetr, qalinligi 3,5 santimetr bo‘lgan ushbu muhtasham asarlar nafaqat salobati, balki yuksak xattotlik mahorati va badiiy yechimi bilan ham alohida ahamiyatga ega. Pannolarda muqaddas «Alloh» va «Muhammad» kalimalari islom kalligrafiyasining eng yuksak an’analari asosida nafis uslubda aks ettirilgan.

Usmoniylar davrida kalligrafiya yozuv san’atidan ancha yuksak ma’naviy va badiiy qadriyat sifatida shakllangan. Masjidlar, madrasalar, saroylar va boshqa me’moriy obidalar ana shunday kalligrafik asarlar bilan bezatilib, ular nafaqat bezak, balki ma’naviy-estetik tarbiya vositasi vazifasini ham bajargan. Mazkur pannolar ham musulmon xalqlarining yuksak estetik didi, xattotlik maktabi va islom san’atining boy an’analarini o‘zida mujassam etgan noyob madaniy meros namunasidir.

Bugun ushbu betakror asarlar O‘zbekistondagi Islom sivilizatsiyasi markazi muzey ekspozitsiyasining eng qimmatli namunalaridan biri sifatida tashrif buyuruvchilarda katta qiziqish uyg‘otmoqda. Ular orqali mehmonlar Usmoniylar davri san’ati, islom kalligrafiyasi va ko‘p asrlik ma’naviy meros bilan yaqindan tanishish imkoniga ega bo‘lmoqdalar. Bu kabi noyob eksponatlar Markazning nafaqat muzey, balki islom sivilizatsiyasining boy ilmiy, madaniy va badiiy merosini jahon hamjamiyatiga yetkazuvchi muhim ma’rifiy maskan sifatidagi o‘rnini yanada mustahkamlamoqda.