Yangiliklar

Tokio shahrida O‘zbekiston elchixonasi hamda Islom sivilizatsiyasi markazi hamkorligida mazkur markazning Yaponiyadagi ilk keng qamrovli taqdimoti tashkil etildi, deb xabar bermoqda “Dunyo” AA muxbiri.

Taqdimotda Yaponiyaning ta’lim va madaniyat muassasalari, xususiy kompaniyalar, sayyohlik tashkilotlari vakillari, Markaziy Osiyo davlatlari hamda Ozarbayjon diplomatik korpusi a’zolari, olimlar, tadqiqotchilar, ommaviy axborot vositalari xodimlari, Yaponiyada istiqomat qilayotgan vatandoshlar va o‘zbek talabalari ishtirok etdi.

Tadbirda O‘zbekiston Respublikasi Prezidenti tashabbusi bilan barpo etilgan O‘zbekistondagi Islom sivilizatsiyasi markazining asosiy maqsad va vazifalari, uning islom sivilizatsiyasi, ilm-fan va madaniyat tarixini o‘rganish, noyob qo‘lyozmalar va madaniy merosni jamlash, saqlash va keng targ‘ib qilishga qaratilgan faoliyati haqida batafsil ma’lumot berildi. Shuningdek, Markaz nafaqat muzey va ilmiy-ma’rifiy majmua, balki turli xalq va sivilizatsiyalar o‘rtasida muloqotni mustahkamlaydigan xalqaro platforma ekani ta’kidlandi.

Taqdimot doirasida Markaz ekspozitsiyalarida aks etadigan mavzular, xususan, O‘zbekistonning boy tarixiy-madaniy merosi, Imom Buxoriy, Imom Termiziy, Imom Moturidiy kabi buyuk allomalarning jahon ilm-fani va islom tafakkuriga qo‘shgan beqiyos hissasi, shuningdek, Amir Temur va temuriylar davrining sivilizatsiya taraqqiyotidagi o‘rni haqida taqdimotlar o‘tkazildi.

Markaz direktori maslahatchisi, professor Tursunali Qo‘ziyev “Ma’rifat orqali kelajakka” mavzusida ma’ruza qilib, O‘zbekistondagi Islom sivilizatsiyasi markazi tarixiy xotirani tiklash, madaniy merosni asrab-avaylash va uni kelajak avlodlarga yetkazish, shuningdek, xalqaro ilmiy va madaniy hamkorlikni rivojlantirishda muhim o‘rin tutishini ta’kidladi.

Yaponiya Rivojlanayotgan iqtisodiyotlar instituti professori Manabu Simidzu o‘z chiqishida O‘zbekistonda amalga oshirilayotgan Uchinchi Renessans g‘oyasi va O‘zbekistondagi Islom sivilizatsiyasi markazi faoliyati mamlakatning boy ma’naviy merosini xalqaro maydonda keng targ‘ib etishga xizmat qilayotganini qayd etdi. U Markaz Yaponiya va O‘zbekiston o‘rtasidagi ilmiy, madaniy va gumanitar aloqalarni yanada mustahkamlash uchun muhim maydon bo‘lib xizmat qilishini alohida ta’kidladi.

Tadbir davomida ishtirokchilarga O‘zbekistondagi Islom sivilizatsiyasi markazi faoliyatiga bag‘ishlangan taqdimot filьmi namoyish etildi. Shuningdek, yurtimizdan yetishib chiqqan buyuk allomalar haqidagi videomateriallar hamda O‘zbekistonning madaniy merosi va me’moriy obidalarini aks ettiruvchi fotoko‘rgazma katta qiziqish bilan qarshi olindi.

Mazkur taqdimot O‘zbekistondagi Islom sivilizatsiyasi markazining xalqaro nufuzini yanada mustahkamlash, uning ilmiy-ma’rifiy salohiyatini xorijiy hamkorlarga tanitish hamda O‘zbekiston va Yaponiya o‘rtasida madaniy-gumanitar hamkorlikni yangi bosqichga olib chiqish yo‘lidagi muhim qadamlardan biri bo‘ldi.