Yangiliklar

Gonkong teleradiokompaniyasi RTHK O‘zbekistondagi Islom sivilizatsiyasi markazi va Gonkongdagi Gugun madaniyat muzeyi o‘rtasida imzolangan hamkorlik memorandumiga keng o‘rin ajratdi. Nashrda mazkur kelishuv islom madaniyati va san’ati sohasida qo‘shma ko‘rgazmalar, ilmiy tadqiqotlar, mutaxassislar tayyorlash va muzeylar o‘rtasida tajriba almashishni rivojlantirishga xizmat qilishi ta’kidlangan. Shuningdek, 2028-yilda Gonkongda Qadimgi Ipak yo‘liga bag‘ishlangan ko‘rgazma tashkil etish, kelgusida esa Gonkong muzeylari kolleksiyalaridagi noyob eksponatlarni O‘zbekistondagi Islom sivilizatsiyasi markazida namoyish etish imkoniyatlari ko‘rib chiqilayotgani qayd etilgan.

Gonkongdagi Gugun madaniyat muzeyi hamda O‘zbekistondagi Islom sivilizatsiyasi markazi o‘rtasida hamkorlik memorandumi imzolandi. Bu muzey tomonidan joriy yilda O‘zbekistonning madaniy muassasasi bilan tuzilgan ikkinchi madaniy hamkorlik memorandumi hisoblanadi.

Muzey direktori Luis Ng ma’lum qilishicha, o‘tgan oyda O‘zbekiston Milliy tarix muzeyi bilan ham hamkorlik memorandumi imzolangan bo‘lib, ayni paytda 2028-yilda Gonkongdagi Gugun madaniyat muzeyida Qadimgi Ipak yo‘liga bag‘ishlangan ko‘rgazmani tashkil etish ishlari olib borilmoqda. Ko‘rgazmada Xitoyning bir qator noyob madaniy meros namunalarini namoyish etish rejalashtirilgan.

Uning ta’kidlashicha, bu galgi O‘zbekistondagi Islom sivilizatsiyasi markazi bilan hamkorlik asosan islom madaniyati va san’ati sohasidagi almashinuvlarga qaratilgan. Kelgusi yillarda qo‘shma ko‘rgazmalar, ilmiy tadqiqotlar va mutaxassislar tayyorlash bo‘yicha dasturlar amalga oshiriladi. Shuningdek, Gonkong muzeylari kolleksiyalaridagi oltin buyumlar, ipak asarlari kabi eksponatlarni O‘zbekistondagi Islom sivilizatsiyasi markazida namoyish etish imkoniyatlari ham ko‘rib chiqiladi. Tomonlar kadrlar almashinuvi, ta’lim sohasidagi hamkorlikni kuchaytirish va Markaziy Osiyo muzeylari bilan tajriba almashishni ham rejalashtirmoqda.

Luis Ng O‘zbekiston boy madaniy merosga ega mamlakat ekanini, mahalliy madaniyat sohasi vakillari Xitoy bilan hamkorlikka katta qiziqish bildirishini qayd etdi. Uning fikricha, O‘zbekistondagi Islom sivilizatsiyasi markazi vakillarining Gonkongga tashrifi va ma’ruzada ishtirok etishi ikki hudud o‘rtasidagi madaniy aloqalarni yanada mustahkamlaydi. Bu, shuningdek, Xitoyning o‘n beshinchi besh yillik taraqqiyot rejasi doirasida Gonkongning xalqaro madaniy va san’at almashinuvi markazi sifatidagi o‘rnini mustahkamlashga xizmat qiladi va kelgusida bu hamkorlikni yanada chuqurlashtirish zarurligini ko‘rsatadi.