Islom sivilizatsiyasi markazi xodimi “Innovatsion loyihalar” tanlovida Gran-pri sohibi bo‘ldi
Vatanimiz mustaqilligining 35 yilligi arafasida Alisher Navoiy nomidagi O‘zbekiston Milliy kutubxonasi tomonidan “Yosh kutubxonachilar” VI Respublika ilmiy-amaliy forumi o‘tkazildi.
Forum doirasida axborot-kutubxona sohasini zamonaviy yondashuvlar asosida rivojlantirish, innovatsion g‘oyalarni qo‘llab-quvvatlash, istiqbolli loyihalarni amaliyotga joriy etish hamda yosh mutaxassislarning salohiyatini namoyon etishi uchun imkoniyat yaratish maqsadida “Innovatsion loyihalar” tanlovi tashkil etildi.
Tanlovda respublika hududlaridan 76 ta startap loyiha ishtirok etdi. Saralash bosqichi natijalariga ko‘ra, eng istiqbolli deb topilgan 12 ta loyiha final bosqichiga yo‘llanma oldi.
Final bosqichida ishtirokchilar o‘z loyihalarini ekspertlar va tanlov hay’ati a’zolariga taqdim etdi. Loyihalar dolzarbligi, innovatsion yondashuvi, amaliy ahamiyati, amalga oshirish mexanizmlari, barqarorligi va kutilayotgan ijtimoiy samaradorligi mezonlari asosida baholandi.
Yakuniy natijalarga ko‘ra, O‘zbekistondagi Islom sivilizatsiyasi markazi Kutubxona va arxiv hujjatlari bo‘limi boshlig‘i Ravshan Qodirov tomonidan taqdim etilgan loyiha tanlovning eng yuqori mukofoti — Gran-priga munosib deb topildi.
Ravshan Qodirov ushbu natija xususida to‘xtalib, quyidagilarni ta’kidladi:
“Tanlovda Gran-pri sohibi bo‘lganimni, avvalo, kasbiy faoliyatimga bildirilgan yuksak baho sifatida qabul qilaman. Bugun axborot-kutubxona sohasida raqamli texnologiyalar va innovatsion yondashuvlardan samarali foydalanish muhim ahamiyat kasb etmoqda. Taqdim etilgan loyiha ham sohadagi zamonaviy talablar va amaliy ehtiyojlardan kelib chiqqan holda ishlab chiqilgan. Ushbu natija kelgusida loyihani yanada takomillashtirish va amaliyotga samarali tatbiq etish borasidagi mas’uliyatimizni yanada oshiradi”, — dedi Ravshan Qodirov.
Tanlov natijasi O‘zbekistondagi Islom sivilizatsiyasi markazi mutaxassislarining axborot-kutubxona sohasida zamonaviy bilim va innovatsion yondashuvlarni amaliyotga tatbiq etish borasidagi salohiyatini namoyon etdi.
Shuningdek, mazkur yutuq Markazda kutubxona va arxiv hujjatlarini saqlash, o‘rganish, tizimlashtirish hamda zamonaviy texnologiyalar asosida ulardan foydalanish imkoniyatlarini kengaytirishga qaratilgan ishlar izchil davom etayotganining amaliy natijalaridan biri bo‘ldi.
Tanlov g‘oliblari diplom hamda qimmatbaho sovg‘alar bilan taqdirlandi.