“Tinchlik va hamjihatlikka chorlovchi maskan”: Singapur Katta vaziri Islom sivilizatsiyasi markaziga tashrif buyurdi
Singapur Respublikasi Katta vaziri Li Syan Lun boshchiligidagi delegatsiya O‘zbekistondagi Islom sivilizatsiyasi markaziga tashrif buyurdi.
Tashrif davomida delegatsiya a’zolari Markaz ekspozitsiyalari bilan yaqindan tanishib, O‘zbekiston hududida ming yillar davomida shakllangan boy ilmiy, ma’naviy va madaniy meros haqida keng tasavvurga ega bo‘ldilar.
Ayniqsa, Qur’oni karim zalida saqlanayotgan VII asrga oid mashhur Usmon Mus'hafi mehmonlarda katta qiziqish uyg‘otdi. Insoniyat tarixidagi eng noyob qo‘lyozma yodgorliklaridan biri sifatida e’tirof etiladigan ushbu Mushaf Markaz ekspozitsiyasining eng qimmatli durdonalaridan biri hisoblanadi.
O‘zbekistondagi Islom sivilizatsiyasi markazi Prezident Shavkat Mirziyoyev tashabbusi bilan barpo etilgan ulkan ilmiy-ma’rifiy loyihadir. Markaz O‘zbekiston zaminidagi qadimiy sivilizatsiyalar, islomdan avvalgi davr merosi, islom madaniyati va ilm-fani taraqqiyoti, Birinchi va Ikkinchi Renessans davrlari hamda Yangi O‘zbekistondagi Uchinchi Renessans poydevori haqida yaxlit tasavvur beradi.
Bu yerda tarix faqat eksponatlar orqali namoyish etilmaydi. Zamonaviy texnologiyalar, ilmiy yondashuv va interaktiv yechimlar orqali ajdodlarimizning jahon sivilizatsiyasi taraqqiyotiga qo‘shgan hissasi yangi avlod va xalqaro mehmonlarga keng taqdim etilmoqda.
Tashrif yakunida Li Syan Lun «Faxriy mehmonlar» kitobiga Markaz haqidagi taassurotlarini yozib qoldirdi. Unda Markazning nafaqat O‘zbekiston tarixiy-madaniy merosini namoyon etayotgani, balki turli madaniyatlar o‘rtasidagi muloqotni rivojlantirishga qaratilgan muhim maqsadlari alohida ta’kidlangan:
«Markaz O‘zbekistonning islomdan avvalgi davrlardan boshlangan boy tarixiy va madaniy merosini, shuningdek, Uchinchi Renassans sari intilishini keng namoyon etmoqda. Markazning madaniyatlararo muloqotni rivojlantirishga qaratilgan qarashlari — tinchlik va hamjihatlik tamoyillari asosida yashayotgan ko‘p millatli va ko‘p dinli jamiyat — Singapurdan kelgan biz uchun nihoyatda yaqin va chuqur mazmunga ega. Markazga o‘zining muhim va ezgu faoliyatida ulkan muvaffaqiyatlar tilayman».
Singapur Katta vazirining ushbu fikrlari Islom sivilizatsiyasi markazining bugungi vazifasi va xalqaro ahamiyatini yana bir bor namoyon etadi.
Zero, Prezident tashabbusi bilan barpo etilgan ushbu majmua O‘zbekistonning ko‘p asrlik tarixini dunyoga tanitish bilan birga, turli xalqlar va madaniyatlar o‘rtasida o‘zaro anglashuv, tinchlik va hamjihatlikni mustahkamlashga xizmat qiladigan zamonaviy ma’rifiy maydon sifatida shakllanmoqda.