Anadoluning XV asrga oid jangovor merosi Islom sivilizatsiyasi markazi ekspozitsiyasida
Jang maydonida otliq uchun nafaqat qurol, balki ishonchli himoya vositasi ham muhim hisoblanadi. Islom sivilizatsiyasi markazi ekspozitsiyasida namoyish etilayotgan XV asrga oid otliq jangchining oyoq himoya zirhi ana shunday harbiy anjomlardan biridir. Mazkur oyoq zirhi Anadolu hududida XV asrda bronzadan yasalgan bo‘lib, uning o‘lchami 35,8 × 23 santimetrni tashkil etadi.
U metall qoplama, uni bir-biriga bog‘lab turuvchi metall halqali to‘r hamda charm tasmalardan tashkil topgan. Zirhning asosiy plastinasi quyi qismida ignabargsimon, yuqori qismida esa biroz qiya yo‘nalgan bo‘rtma qovurg‘alar qabartirib ishlangan. Ushbu bezaklar orasida, shuningdek, zirhning yuqori va quyi qismlarida islimiy naqshlar saqlanib qolgan. Yuqori qismida esa yozuv parchasi mavjud.
Zirhning yon plastinalari asosiy qismga halqalar vositasida biriktirilgan. Harakatlanuvchi halqali to‘r jangchining oyoq bo‘g‘imlariga moslashib, erkin harakatlanish imkonini bergan. Saqlanib qolgan charm tasmalar esa zirhni oyoqqa mahkamlash vazifasini bajargan. Bunday XV asrga oid oyoq zirhlari Qoraqo‘yunli va Oqqo‘yunli turklarning siyosiy-madaniy muhiti bilan bog‘lanadi. Keyinchalik shu kabi zirh shakllari Usmoniylarning harbiy an’analarida ham qo‘llangan.
Bugun bu ashyo faqat jangovar anjom sifatida emas, balki o‘rta asrlar harbiy madaniyati, hunarmandlik mahorati va bezak san’ati uyg‘unlashgan tarixiy manba sifatida ham qimmatlidir.