Nuroniylar va yoshlar Islom sivilizatsiyasi markazida ma’rifiy uchrashuv o‘tkazdilar
Yosh avlodning tarixiy xotirasi va milliy qadriyatlarga bo‘lgan qiziqishini oshirish, ularni ilm-ma’rifatga keng jalb etishda ma’rifiy uchrashuvlarning ahamiyati katta. Shu maqsadda «Nuroniylar jamg‘armasi» tashabbusi bilan bir guruh o‘quvchi-yoshlar O‘zbekistondagi Islom sivilizatsiyasi markaziga tashrif buyurdilar.
Tashrif davomida yoshlar Markaz ekspozitsiyalari bilan tanishib, yurtimiz hududida asrlar davomida shakllangan ilmiy va madaniy meros, buyuk allomalarning jahon sivilizatsiyasi taraqqiyotiga qo‘shgan hissasi haqida ma’lumot oldilar. Markazning zamonaviy kutubxonasi, tarixiy qo‘lyozmalar va nodir eksponatlar ham ularda katta qiziqish uyg‘otdi.
Ma’rifiy tashrif doirasida nuroniylar va yoshlar o‘rtasida samimiy muloqot ham tashkil etildi. Uchrashuvda katta avlod vakillari hayotiy tajribalari, ta’lim-tarbiya va ilm olishning inson kamolotidagi o‘rni haqida fikrlari bilan o‘rtoqlashdilar. Yoshlar esa o‘zlarini qiziqtirgan savollar bilan murojaat qilib, tarix, ilm-fan, kitobxonlik va zamonaviy ta’lim masalalari yuzasidan fikr almashdilar.
Muloqotda insonning bilim olishga bo‘lgan intilishi va o‘z ustida muntazam ishlashi yuksak natijalarning muhim omili ekani ta’kidlandi. Zero, tarixda nom qoldirgan buyuk allomalarning ilmiy merosi ortida yillar davomidagi izlanish, mehnat va ma’rifatga bo‘lgan sadoqat mujassam.
Bunday uchrashuvlar yoshlarni ajdodlar merosini chuqurroq o‘rganishga, nuroniylarning hayotiy tajribasidan saboq olishga va ilmga bo‘lgan qiziqishini yanada mustahkamlashga xizmat qiladi.
Nuroniylar va yoshlarni bir ma’rifiy maskanda birlashtirgan mazkur tashrif avlodlar o‘rtasidagi ma’naviy bog‘liqlikni mustahkamlash, tarixiy merosni yangi avlodga yetkazish va uni asrab-avaylashning amaliy ifodasi bo‘ldi.