Amir Temur nomidagi davlat stipendiyasi joriy etilishi taklif etilmoqda
O‘zbekistonda iqtidorli talabalarni qo‘llab-quvvatlash maqsadida 2027/2028 o‘quv yilidan Amir Temur nomidagi davlat stipendiyasini joriy etish taklif qilinmoqda. Hozircha bu tashabbus Vazirlar Mahkamasi qarori loyihasida nazarda tutilgan.
Stipendiyaga davlat, nodavlat va xorijiy oliy ta’lim muassasalari, shuningdek, qo‘shma ta’lim dasturlarining oxirgi ikki bosqichida tahsil olayotgan talabalar da’vogar bo‘lishi mumkin. Har bir oliy ta’lim tashkiloti uchun bitta stipendiya ajratilishi taklif etilgan.
📌Da’vogardan talab etiladi:
— a’lo baholarga o‘qish;
— ilmiy yoki ijodiy faoliyat bilan shug‘ullanish;
— konferensiya va tanlovlarda ishtirok etish;
— O‘zbekiston tarixi va davlat tilini bilish;
— kamida bitta xorijiy tilni bilish;
— bitiruv malakaviy ishini Amir Temur va temuriylar merosiga bag‘ishlash yoki shu yo‘nalishda kamida 2 ta ilmiy ish e’lon qilgan bo‘lish.
Loyihaga ko‘ra, tanlovning keyingi bosqichiga tavsiya etilgan talabgorlar hujjatlarini har yili 5–15 sentyabrь kunlari my.edu.uz tizimi orqali yuklaydi. Shuningdek, stipendiya sohibi bo‘lgan talabalarni bakalavriatni tugatgandan keyin bir yil ichida magistraturaning kunduzgi ta’lim shakliga tanlovsiz, qo‘shimcha davlat granti asosida qabul qilish taklif etilmoqda.
Eslatma: hozircha bu talablar qaror loyihasidagi takliflar hisoblanadi, ya’ni yakuniy tartib tegishli qaror qabul qilingach aniqlanadi.