Nashrlar sifati va ilmiy mas’uliyat — ustuvor vazifa
O‘zbekistondagi Islom sivilizatsiyasi markazi direktori tomonidan nashrlar faoliyati tahlil qilindi.
Islom sivilizatsiyasi markazida nashrga tayyorlanayotgan ilmiy-ma’rifiy adabiyotlarning mazmuniy saviyasi, ilmiy aniqligi va tahrir sifatini yanada takomillashtirish masalalariga bag‘ishlangan navbatdagi ishchi yig‘ilish bo‘lib o‘tdi.
Yig‘ilishda ayni paytda tayyorlanayotgan kitoblar, fundamental asarlar, tarjimalar va boshqa nashrlarning joriy holati batafsil tahlil qilindi. Har bir nashrni chop etishga tavsiya qilishdan avval uning ilmiy konsepsiyasi, manbalar bilan ishlash darajasi, matnning mazmuniy yaxlitligi, tarjima va tahrir sifati bo‘yicha qat’iy ekspertizadan o‘tkazish zarurligi ta’kidlandi.
Xususan, 114 Qur’on nusxasini tayyorlash jarayonining bugungi holati, amalga oshirilayotgan ilmiy va tahririy ishlar ham alohida ko‘rib chiqildi. Mazkur yo‘nalishdagi har bir bosqichda tarixiy-ilmiy aniqlik, matnga mas’uliyatli munosabat va yuqori nashriyot standartlariga rioya etish masalalariga ustuvor ahamiyat qaratildi.
Shuningdek, nashrga tayyorlanayotgan kitoblardagi mavjud xato va kamchiliklarni ekspertlar guruhi ishtirokida aniqlash va bartaraf etish, mualliflar, muharrirlar, tarjimonlar hamda soha mutaxassislari o‘rtasidagi hamkorlikni kuchaytirish bo‘yicha aniq vazifalar belgilandi.
Yig‘ilishda kitobni shunchaki nashr etish emas, balki ilmiy jihatdan puxta, mazmunan mukammal va uzoq yillar ishonchli manba bo‘lib xizmat qiladigan nashr yaratish Markaz noshirlik faoliyatining asosiy mezonlaridan biri bo‘lishi lozimligi qayd etildi.
Muhokamalar yakunida har bir nashrning tayyorlik holatini qayta ko‘rib chiqish, aniqlangan kamchiliklarni belgilangan muddatlarda bartaraf etish hamda yakuniy materiallarni ekspertiza asosida nashrga tavsiya etish yuzasidan tegishli topshiriqlar berildi.
