«Bu — ko‘rmay turib dunyodan o‘tib ketmaslik kerak bo‘lgan maskan» — Ibrahim Yumakli
Turkiya Respublikasi Qishloq va o‘rmon xo‘jaligi vaziri Ibrahim Yumakli boshchiligidagi delegatsiya O‘zbekistondagi Islom sivilizatsiyasi markaziga tashrif buyurdi.
Mehmonlarni Markaz direktori Firdavs Abduxoliqov kutib olib, delegatsiya a’zolariga majmuaning ilmiy-ma’rifiy konsepsiyasi, ekspozitsiyalari va faoliyati haqida ma’lumot berdi.
Tashrif davomida Turkiya delegatsiyasi Markazda jamlangan tarixiy va madaniy meros, noyob artefaktlar hamda zamonaviy ilmiy-ma’rifiy yechimlar bilan yaqindan tanishdi.
Ibrahim Yumakli tashrif taassurotlari haqida so‘zlar ekan, Markazda jamlangan tarixiy meros va uning badiiy talqinini so‘z bilan to‘liq ifodalash qiyin ekanini ta’kidladi:
«Avvalo, bu buyuk san’at asari bo‘lgan markazni ifodalashga so‘zlar ojiz. “Haqiqatan ham ta’sirlandim”, deyishning o‘zi ham bu maskan menda uyg‘otgan taassurotni to‘liq ifodalab bera olmaydi. Ota-bobolarimiz merosi joy olgan ushbu qutlug‘ zaminda insonni beqiyos tarixiy sayohatga olib chiqadigan bu qadrli markazni, avvalo, butun dunyo musulmonlari, shuningdek, barcha turkiy xalqlar, san’at, tarix va o‘tmishga qiziqadigan har bir inson albatta ko‘rishi kerak. Bu — ko‘rmay turib dunyodan o‘tib ketmaslik kerak bo‘lgan maskan».
Ibrahim Yumakli Markazning barpo etilishida O‘zbekiston Respublikasi Prezidenti Shavkat Mirziyoyevning tashabbusi va shaxsiy e’tiborini alohida qayd etib, bunday ulkan tarixiy-ma’rifiy majmuani yaratish imkoni uchun minnatdorlik bildirdi.
«Inshaalloh, bundan buyon uchratgan va suhbatlashgan har bir insonga bu maskan haqida so‘zlab beraman», — dedi Turkiya vaziri.
Shuningdek, u Markazning barpo etilishiga hissa qo‘shgan ishchilar, ustalar, muhandislar va barcha mutaxassislarga tashakkur bildirdi.
Tashrif so‘ngida Markaz direktori Firdavs Abduxoliqov tomonidan Turkiya delegatsiyasi rahbariga esdalik sovg‘alari topshirildi.
Ibrahim Yumakli «Faxriy mehmonlar» kitobida ham o‘z taassurotlarini qoldirdi:
«Hurmatli O‘zbekiston Prezidenti Shavkat Mirziyoyevning shaxsiy qarashlari va yo‘l-yo‘riqlari asosida bunyod etilgan ushbu ulkan asar haqida so‘zlar ojiz. Qardosh O‘zbekistonni va ajdodlarimiz yashab o‘tgan ushbu betakror zaminlarni ziyorat qilish, bu bebaho meros bilan yana bir bor tarixiy sayohat qilish imkoniga ega bo‘lganimdan baxtiyorman. Shu fursatdan foydalanib, barchaga chuqur hurmatimni bildiraman. O‘zbekiston va Turkiya qardoshligi abadiy davom etadi va avloddan-avlodga yetkaziladi».