USTOZ VA MURABBIYLAR — MA’RIFAT VA TARBIYANING YUKSAK TIMSOLI
O‘zbekistondagi Islom sivilizatsiyasi markazida 1-oktyabr — O‘qituvchi va murabbiylar kuni munosabati bilan ustoz va murabbiylarni sharaflashga bag‘ishlangan tadbir bo‘lib o‘tdi.
Prezident Shavkat Mirziyoyev tashabbusi bilan barpo etilgan O‘zbekistondagi Islom sivilizatsiyasi markazida ilm-fan, ta’lim, ma’rifat va madaniyat sohalarida ko‘p yillik tajribaga ega olimlar, ustozlar va mutaxassislar faoliyat yuritib kelmoqda. Bayram tadbiri ana shu fidoyi insonlarga yuksak ehtirom va minnatdorlik ifodasi bo‘ldi.
Tadbirda O‘zbekistondagi Islom sivilizatsiyasi markazi direktori Firdavs Abduxoliqov ustoz va murabbiylarni qutlab, ularning jamiyat ma’naviy hayotidagi o‘rni beqiyos ekanini ta’kidladi.
Ustoz — insonga nafaqat bilim, balki hayot sabog‘ini, ma’naviy qadriyatlarni ham beradigan ulug‘ zot. Ayniqsa, tarix, ilm-fan va ma’rifatni o‘rganish hamda uni kelajak avlodga yetkazishda ustozlarning mehnati alohida ahamiyatga ega. Markazimizda faoliyat yuritayotgan har bir olim va mutaxassis o‘z bilimi, tajribasi va fidoyiligi bilan yosh avlod tarbiyasiga munosib hissa qo‘shmoqda, — dedi Firdavs Abduxoliqov.
Uchrashuv davomida Markazda faoliyat yuritayotgan ustoz va olimlarning ilmiy-ma’rifiy sohadagi ko‘p yillik mehnati alohida e’tirof etildi.
Jumladan, tarix fanlari doktori, professor Zohidullo Munavvarov, shuningdek, davlat tashkilotlarida uzoq yillar mas’ul va rahbarlik lavozimlarida mehnat qilgan tajribali mutaxassislar hamda Markaz jamoasining bir qator faol xodimlari bayram munosabati bilan samimiy qutlandi. Ularga gullar taqdim etilib, ezgu tilaklar bildirildi.
Tadbirda so‘zga chiqqanlar ustozlik va murabbiylik kasbi inson kamoloti, jamiyat taraqqiyoti va ma’naviy yuksalishning muhim omili ekanini ta’kidladilar.
O‘zbekistondagi Islom sivilizatsiyasi markazi bugun nafaqat tarixiy va madaniy merosni namoyish etuvchi maskan, balki ilm-fan, ma’rifat va ta’limni uyg‘unlashtirgan o‘ziga xos xalqaro ilmiy-ma’rifiy platforma sifatida ham shakllanib bormoqda. Bu yerda faoliyat yuritayotgan olimlar, ustozlar va mutaxassislarning bilim va tajribasi Markazning ana shu yuksak maqsadlarini amalga oshirishda muhim ahamiyat kasb etadi.
Bayram tadbiri samimiy muloqot, ezgu tilaklar va ustozlarga bo‘lgan yuksak ehtirom ruhida o‘tdi.