Boboxonovlar sulolasi boʻlimiga yangi kontentlar taqdim etiladi
Oʻzbekistondagi Islom sivilizatsiyasi markaziga Qozogʻistondagi “Nur-Muborak” Misr islom madaniyati universiteti dotsentlari tashrif buyurdi. Uchrashuvda Markaz direktorining birinchi oʻrinbosari Firdavs Halimov mehmonlarga bunyod etilayotgan markaz binosi va uning boy ekspozitsiyasi haqida batafsil maʼlumot berib oʻtdi.
Qozogʻiston bilan ilmiy-maʼrifiy masalalarda ham hamkorligimiz yaxshi yoʻlga qoʻyilgan. Shuning uchun ham ikki davlat oʻrtasidagi munosabatlar bardavom rivojlanmoqda. Ostonada ulkan masjid barpo etilgani bizni juda xursand qilgan. Biz qoʻshni mamlakatlarda boʻlgan islohotlardan boshimiz koʻkka yetadi. Oʻzbekistondagi Islom sivilizatsiyasi markazining bunyod etilishi ularni ham birday mamnun etadi deb oʻylayman. Shuning uchun ular markazni biz bilan birga bunyod etishda yelkama-yelka boʻlishga shay turishibdi, – dedi Firdavs Halimov.
Uchrashuvda mehmonlarga Markaz kutubxonasi va boʻlimlari alohida tanishtirib oʻtildi. Markaz ekspozitsiyasini boyitish boʻyicha qilinayotgan ishlar, tuzilgan ilmiy-innovatsion medialoyihalar haqida maʼlumot berildi.
– Oʻzbekistonda bunyod etilayotgan ushbu mega inshoot bizni mamnun etdi va hayratga soldi. Markaz ekspozitsiyasini boyitish uchun universitetimizning olimlar jamoasi sidqidildan yordam berishga tayyor. Bu maʼrifiy maskan nafaqat Oʻzbekiston uchun balki qoʻshni davlatlar uchun ham faxr va iftixor boʻlib xizmat qiladi. Bizda markazga inʼom etadigan artefaktlar ham bor. Ularni mavzular kesimida ekspozitsiyaga taqdim etish masalalarini kelishib olish kerak, – dedi Qozogʻistondagi “Nur-Muborak” Misr islom madaniyati universiteti dotsenti Askar Akimxanov.
Shuningdek, mehmonlar Markazning Boboxonovlar sulolasi maxsus boʻlimi uchun yangi kontentlar taqdim etish imkoni borligi maʼlum qildi. Bu borada maxsus ekspeditsiya tashkil etilib, ilmiy guruh manbalarni tadqiq etishi kerakligi haqida tavsiyalar berib oʻtdi.
Uchrashuv davomida mehmonlarga Yangi Oʻzbekistonda amalga oshirilayotgan diniy-maʼrifiy islohotlar haqida va Oʻzbekistondagi Islom sivilizatsiyasi markazining bunyod etilishiga bagʻishlangan videorolik namoyish etildi.