Yangiliklar

 

Toshkentda Oʻzbekistondagi Islom sivilizatsiyasi markazi tarixiy va maʼnaviy merosni zamonaviy ilmiy muhitda saqlash va rivojlantirish maqsadida xalqaro kongressga mezbonlik qildi. Kongress doirasida Qozogʻiston, Qirgʻiziston, Tojikiston, Turkmaniston, Ozarbayjon va Oʻzbekistondan diniy, ilmiy va maʼrifiy muassasalar vakillari ishtirok etib, mintaqaviy hamkorlik va Islom qadriyatlarini asrab-avaylash masalalarini keng muhokama qildi.

Prezident Shavkat Mirziyoyev tashabbusi bilan Oʻzbekistondagi Islom sivilizatsiyasi markazida boʻlib oʻtgan “Markaziy Osiyo: umumiy maʼnaviy-maʼrifiy meros – umumiy kelajak” xalqaro kongressi doirasida islom qadriyatlarini muhofaza qilish va ilmiy hamkorlikni kuchaytirishga qaratilgan shoʻʼba yigʻilishi tashkil etildi. Unda Qozogʻiston, Qirgʻiziston, Tojikiston, Turkmaniston, Ozarbayjon va Oʻzbekistondan diniy idoralar, ilm-fan va maʼrifat muassasalari vakillari qatnashdi.

Kongress doirasida tashkil etilgan shoʻʼba yigʻilishi mintaqa xalqlarini birlashtirib turgan umumiy maʼnaviy va diniy merosning ahamiyati haqida keng muhokama maydonini yaratdi.

Oʻsh davlat universiteti Teologiya fakulteti dekani Zaylabidin Ajimamatov Islom sivilizatsiyasi markazini Markaziy Osiyodagi eng muhim ilmiy-maʼrifiy maskanlardan biri sifatida taʼkidlab, quyidagi fikrni bildirdi:

“Oʻzbekistondagi Islom sivilizatsiyasi markazi asrlar davomida shakllangan maʼrifiy merosni zamonaviy asosda qayta jonlantirmoqda. Bu yerdagi qoʻlyozmalar, ekspozitsiyalar va ilmiy muhit mintaqaviy tadqiqotlar uchun beqiyos asos yaratadi”.

Uning bu fikrlari kongress ishtirokchilari tomonidan ham qoʻllab-quvvatlandi. Xususan, markazning zamonaviy infratuzilmasi, raqamli texnologiyalardan foydalangan ekspozitsiyalari va ilmiy maʼlumotlarni ochiq muhitda taqdim etish usuli alohida eʼtirof etildi.

Qozogʻiston musulmonlari diniy idorasi masʼul xodimi Nurlan Qayrbekov ham kongress haqidagi taassurotlari bilan oʻrtoqlashdi:

“Toshkentdagi kongress doirasidagi tadbirlar ilm ahli uchun katta maydon. Ulamolar va professorlar bilan ochiq muloqot qilish biz uchun ulkan tajriba boʻldi”.

Shuningdek, u Oʻzbekiston Prezidenti Shavkat Mirziyoyevning Islom maʼrifati va madaniyatini rivojlantirish borasidagi tashabbuslarini alohida qayd etdi:

“Bu kabi markazning barpo etilishi — Prezidentning diniy-maʼrifiy sohada amaliy qadamlar qoʻyayotganining yorqin dalili. Bu xalq uchun juda katta xizmat”.

Tadbir davomida islom qadriyatlarini asrab-avaylash, yosh avlodni maʼnaviy tarbiyalash, tarixiy merosni saqlashga doir taklif va tavsiyalar ishlab chiqildi. Ishtirokchilar Oʻzbekiston xalqaro islomshunoslik akademiyasi, Toshkent islom universiteti va Hazrati Imom majmuasiga amaliy tashrif buyurib, markazlashgan ilmiy muhit bilan tanishdilar.

Kongress ishtirokchilari tadbirning ahamiyatini yuqori baholab, islom qadriyatlarini muhofaza qilish, maʼrifiy qadriyatlarni targʻib etish va mintaqaviy hamkorlikni mustahkamlash borasida bu platformaning ulkan oʻrni borligini taʼkidladilar.

Tadbir kelgusida qoʻshma ilmiy loyihalar, doimiy muloqot va Markaziy Osiyo mamlakatlari oʻrtasidagi maʼrifiy integratsiyani yanada chuqurlashtirishga xizmat qilishi taʼkidlandi.