Oʻzi haqida oʻzi maʼlumot beradigan kitoblar haqida eshitganmisiz?
Bu loyiha yurtimizda Prezident Shavkat Mirziyoyev tashabbusi bilan bunyod etilayotgan Oʻzbekistondagi Islom sivilizatsiyasi markazi va Italiyaning “Magister Art” kompaniyasi tomonidan amalga oshirilmoqda. Shuningdek, tez orada yurtimizda Sivilizatsiyalar bogʻi tashkil etilishi kutilyapti. Bu haqda joriy yil sentabr oyida ochilishi kutilayotgan megaloyihaning kontentlarini boyitish boʻyicha mahalliy olimlar va xorijiy mutaxassislar ishtirokida boʻlib oʻtayotgan qizgʻin muhokamalarda maʼlum qilindi.
Maʼlum boʻlishicha, Oʻzbekistondagi Islom sivilizatsiyasi markazidan oʻrin olayotgan “Birinchi Renessans davri” ekspozitsiyasi jahon andozalari asosida tashkil etilyapti.
Italiyaning “Magister Art” kompaniyasining kreativ direktori Alessandra Kostantini, mashhur arxitektor Laura Peretti hamda Markaz xodimlari, hamkor tashkilotlar vakillari ishtirokida oʻtkazilgan muhokamada loyiha ishtirokchilari tomonidan ekspozitsiyaning islom ilmlari, aniq va tabiiy fanlar, Bogʻdod va Xorazm Maʼmun akademiyalari kabi sektorlarga qoʻyiladigan eksponatlar va markaz binosi atrofida tashkil etiladigan maxsus sivilizatsiyalar bogʻi haqida soʻz yuritildi.
Dunyo boʻylab madaniy va maʼrifiy tadbirlar, xalqaro koʻrgazmalarni tashkil etuvchi Italiya kompaniyasi ekspozitsiyaning tarkibiy qismlari, uning vizual va konseptual mazmunini yanada takomillashtirishga oid takliflar berdi. Xususan, meʼmoriy meros, sanʼat namunalari va ilmiy kashfiyotlarni zamonaviy texnologiyalar orqali namoyish etish usullari koʻrib chiqildi. Ushbu tashkilot madaniy merosni targʻib qilish, kino va mediamahsulotlar yaratish hamda mashhur sanʼat va ilm ahllari bilan hamkorlik qilish borasida katta tajribaga ega.